The Washington Post: Пит Ҳегсет Иккинчи жаҳон урушида генерал Дуайт Эйзенхауэр фойдаланган тарихий глобусни шикастлаб қўйди

The Washington Post газетаси хабар беришича, АҚШ ҳарбий вазири Пит Ҳегсет Иккинчи жаҳон уруши йилларида генерал Дуайт Эйзенхауэр фойдаланган глобусни ўзининг шахсий иш хонасига олиб ўтишни буюрган. Пентагонда сақланган мазкур глобус тарихий аҳамиятга эга ноёб буюм ҳисобланади. У кейинчалик АҚШ президенти бўлган генерал Эйзенхауэрга тегишли бўлган.

Тарихий буюмларни бино ичида кўчириш одатда махсус тайёргарликдан ўтган мутахассислар назорати остида, қатъий хавфсизлик қоидаларига мувофиқ амалга оширилади. Бироқ Ҳегсетнинг ходимлари глобусни кўчириш вазифасини ўз гуруҳига топширган. Кўчириш жараёнида ходимлар глобусни ушлаб туролмай, уни тушириб юборган. Оқибатда глобус ўз таглигига урилиб, конструкциянинг бир қисми Антарктида тасвирланган ҳудуддаги нозик ташқи қопламани тешиб ўтган. Натижада унинг сиртида бир неча сантиметрлик ёриқ пайдо бўлган.

🇺🇸 АҚШ Ҳарбий вазирлиги газета сўровига жавобан глобус 3 февраль куни уни «кўчиришга уриниш» жараёнида шикастланганини тасдиқлаган.

Вазирлик вакили Кристофер Сариджнинг маълум қилишича, глобусда тешик пайдо бўлиши билан бирга, унинг шарсимон қисми айланишини таъминлаб турган металл таянч конструкциясидан ҳам ажралиб кетган.

Шундан сўнг шикастланган тарихий буюмни бошқа жойга кўчирмаслик тўғрисида қарор қабул қилинган.