Шимолий Корея хакерлари 400 миллион долларлик криптовалютани ўғирлади
АҚШ Адлия вазирлиги ва Федерал қидирув бюроси (ФБР) маълумотларига кўра, Шимолий Корея хакерлари сўнгги 18 ой давомида 400 миллион доллардан ортиқ криптовалютани ўғирлаган. Кибержиноятчилар сунъий интеллект, сохта видеоконференциялар ва психологик манипуляциялардан фойдаланиб, жабрланувчиларнинг компьютерларига кириш имкониятини қўлга киритган.
АҚШ расмийларининг фикрича, ўғирланган маблағлар Ким Чен Ин режими ва унинг ҳарбий дастурларини молиялаштиришга йўналтирилмоқда.
FaceStealer деб номланган ушбу фирибгарлик схемаси доирасида хакерлар криптовалюта компаниялари ходимлари ва дастурий таъминот ишлаб чиқувчиларини видеоқўнғироқларга таклиф қилган. Бунинг учун улар жабрланувчиларнинг танишларига тегишли бузиб кирилган аккаунтлардан фойдаланган.
Видеомулоқот давомида жабрланувчилар ўзлари ишонадиган инсоннинг олдиндан ёзиб олинган видеосини кўрган. Айрим ҳолларда эса жиноятчилар криптовалюта соҳасидаги машҳур вакилларнинг дипфейк тасвирларидан фойдаланган.
Кейин хакерлар техник носозликни саҳналаштирган. Масалан, суҳбатдошнинг овози эшитилмаётганини баҳона қилиб, унга муайян ҳаволага ўтиш ёки компьютерда маълум амалларни бажаришни таклиф қилган.
Натижада қурилмага зарарли дастур ўрнатилган. Бу эса жиноятчиларга криптовалютани ўғирлаш, аккаунтларни эгаллаб олиш ва жабрланувчиларнинг алоқалари ҳақидаги маълумотларга кириш имконини берган.
ФБР маълумотларига кўра, жиноятчилар кейинчалик жабрланувчиларнинг веб-камералари орқали олинган видеолардан ҳам фойдаланган. Улар ушбу ёзувлар ёрдамида жабрланувчиларнинг шахсига кириб, уларнинг танишларини ҳам алдаган. Терговчилар 900 дан ортиқ видеёзувни аниқлаб, мусодара қилган.
12 ноябрь куни АҚШ Адлия вазирлиги FaceStealer операциясида фойдаланилган булутли инфратузилма мусодара қилинганини маълум қилди.
Шунингдек, Америка расмийлари Binance криптовалюта биржасига қарши алоҳида ҳужум давомида ўғирланган 1,2 миллиард доллардан ортиқ криптовалютани хатлаш ёки блоклаш бўйича суд қарорларини ҳам қўлга киритган.
