Тинчлик музокаралари ҳақида гап кетганда, Россияга ишониб бўлмайди — НАТО Бош котиби ўринбосари
Мирча Жоанэ бу ҳақда 9 апрел куни Британиянинг LBC радиостанциясига берган интервьюсида айтиб ўтди.
“Агар Россия расмийлари тинчлик ҳақида гапира бошласа ҳам, бу тинчликка эриши учун эмас, балки қайта қуролланиш ва кейинчалик яна ҳужум қилиш учун сулҳ ҳақида бўлади”, — дея фикрини изоҳлади Жоанэ.
Жоанэнинг таъкидлашича, НАТО аъзолари сўнгги йилларда мудофаа соҳасини эътиборсиз қолдирган ва эҳтимолий урушга тайёр бўлмаган.
“Биз ҳаммамиз тинчроқ дунёда яшашимизга ишонар эдик. Ҳозир эса шафқатсиз янги воқеликда “уйғондик”. Алянс аъзолари халқаро можарога тўлиқ тайёр эмас”, — дея таъкидлади бош котиб ўринбосари.
Шу билан бирга, Жоанэ Украинанинг ЕИ ва НАТОга киришини “муқаррар” деб атади ва АҚШда бўлажак президентлик сайловида Доналд Трамп ғалаба қозонган тақдирда ҳам Қўшма Штатлар алянс билан ҳамкорликни давом эттиришига ишонч билдирди.
