Анталияда дор йўли кабинаси қулаб тушди
Туркиянинг Анталия шаҳрида Тюнектепе дор йўлининг кабинаси қулаб тушди. Бу ҳақда TRT хабар берди.
Номаълум сабабга кўра, дор йўли таянчларидан бири узилиб кетган, оқибатда ҳаракатланувчи кабиналардан бири қулаб тушган. Ичида 8 киши бўлган кабина устунга урилиб, ағдарилган. Одамлар тошлоқ жойга тушиб кетган.
Бир киши ҳалок бўлган, саккиз киши яраланган. Улар орасида Қирғизистон фуқароси ҳам бор. Воқеа жойига кўплаб тиббий гуруҳлар ва ўт ўчирувчилар жалб қилинган. Одамларни бошқа кабиналардан эвакуация қилиш учун вертолёт жўнатилган. Жами 184 киши дор йўлидаги кабиналарда қолиб кетган.
