Ўзбекистонда бўлиб ўтадиган Жаҳон чемпионати иштирокчилари аниқланмоқда
2024 йилги футзал бўйича Жаҳон чемпионати Ўзбекистон ареналарида бўлиб ўтади. Шу кунларда мундиал мезбонлик қиладиган шаҳарлар номлари эълон қилинади.
Дунёнинг энг кучли 24 терма жамоаси Жаҳон чемпионлиги учун кураш олиб борадиган мазкур мусобақа тарихда 10-бор ташкил этилмоқда. Унда ғолиб Португалиядан ториб, беш карра чемпион Бразилия, шунингдек, Франсия ва Янги Зеландия каби дебютантлар жорий йилнинг 14 сентябрь — 6 октябрь кунлари юртимизда жам бўлишади.
Ҳозирга қадар мусобақанинг 17 та иштирокчиси аниқ бўлиб улгурди. Айни пайтда Таиланд мезбонлик қилаётган футзал бўйича Осиё чемпионатида мундиалнинг Ўзбекистонга қўшиладиган яна 4 та иштирокчиси номи маълум бўлади.
Айни вақтда Никарагуада КОНКАКАФ футзал чемпионати ўтказилмоқда ва бугун унда ярим финалчилар аниқланди. Хусусан, Коста-Рика, Панама, Гватемала ва Куба ярим финалга чиқиш орқали ЖЧ-2024 йўлланмасини нақд қилишди.
Шу кунларда Марокашда ўтаётган футзал бўйича Африка Миллатлар кубогида ҳам мундиалнинг 3 та қатнашчиси номи маълум бўлади.
Шунингдек, куни кеча УЕФА вакиллари орасида ҳам охирги қатнашчилар маълум бўлди. Булар – Хорватия ва Нидерландия. Ҳозирча яна 7 та йўлланма эгаси номи очиқ турибди.
Футзал бўйича ФИФА Жаҳон чемпионати-2024 иштирокчилари:
Мезбон: Ўзбекистон
КОНКАКАФ: Коста-Рика, Панама, Гватемала, Куба
КОНМЕБОЛ: Бразилия, Аргентина, Парагвай ва Венесуела
ОФК: Янги Зеландия
УЕФА: Қозоғистон, Франсия, Португалия, Испания, Украина, Хорватия ва Нидерландия
