Самарқанд вилояти Каттақўрғон шаҳрида аёл хориждаги турмуш ўртоғи билан телефонда жанжаллашиб, кичик ёшдаги ўғлини бўғмоқчи бўлгани акс этган видеолавҳа тарқалди. Ҳолат юзасидан вилоят ИИБ матбуот хизмати изоҳ берди.

Қайд этилишича, Нурафшон маҳалласида яшовчи 32 ёшли аёл Ф.М. қонуний никоҳдан ўтмаган турмуш ўртоғи билан ўзаро келишмовчилик оқибатида эрига жаҳл қилиб, вояга етмаган фарзандига нисбатан жисмоний куч ишлатиб, қийнаган.

Ҳозирда боланинг соғлиғи ва аҳволи яхши экани, мутахассислар назоратига олингани хабар қилинди.

Аёл ушбу ҳодисадан кейин берган интервьюсида пушаймон экан, бироқ фарзандига зарар етказиш мақсади бўлмаганини билдирди.

«Кечирасизлар. Қилган ишимдан пушаймонман. Эримга аччиқ қилиб, шу ишни қилдим. Унинг у ерда (Россияда) хотини бор экан. Келаман деб, келмаяпти, нима қилишим керак… Лекин мен боламни бўғганим йўқ. Қўлим мана бундай турганди (қўллари билан кўрсатиб — таҳр.). Мажбурликдан шу ишни қилдим. Мен боламга зиён етказишни хоҳламайман-ку. Ҳушидан ҳам кетгани йўқ бола, у соғлом. Болам унга керак бўлмаса, менга керак. Россияда туриб, бунақа нарсаларни чиқариб юборяпти эрим томондагилар. Боламни ҳеч кимга беришни хоҳламайман», — деди у.

Аёлнинг сўзларига кўра, ҳодисадан сўнг у билан тушунтириш ишлари олиб борилган, шаҳар ҳокимлигидан унга иш таклиф қилишган.