Франциялик атлет Сункамба Силла Париж Олимпиадасининг очилиш маросимига ҳижоб ўрагани учун киритилмади
Франциялик атлет, югурувчи Сункамба Силла 2024-йилги Париж Олимпиадасининг очилиш маросимига ҳижоб ўрагани учун киритилмаганини айтди. Бу ҳақда Associated Press хабар бермоқда.
“Мамлакатингиз мезбонлик қиладиган Олимпия ўйинларида иштирок этиш ҳуқуқини қўлга киритдингиз, лекин рўмол ўраганингиз учун очилиш маросимида иштирок эта олмайсиз”, – дейилган 26 ёшли спортчига.
Силла Олимпиадада аралаш 4х400 м эстафета баҳсларида иштирок этади.
Франция олимпия қўмитаси Силла билан спортчилар учун дунёвий талабларга жавоб берадиган ечим топиш устида ишлаётганини айтди.
Яқинда бўлиб ўтган Енгил атлетика бўйича Европа чемпионатида Силла бошини тўлиқ ёпган махсус қалпоқчада қатнашганди.
