Google Maps хизмати Украина ҳарбий объектларининг жойлашуви акс этган суратларни чоп этди
Бу ҳақда Украина Миллий хавфсизлик ва мудофаа кенгаши қошидаги Дезинформацияга қарши кураш маркази раҳбари Андрей Коваленко маълум қилди.
Унга кўра, Украина томони Google’га хариталардаги расмларни тузатиш талаби билан мурожаат қилган.
«Google вакиллари оммавий ахборот воситаларида тегишли хабарлар пайдо бўлганидан кейин Украина расмийлари боғланиб, вазиятни ҳал қилишга ваъда беришди», — дея аниқлик киритди Коваленко.
Хариталарда пайдо бўлган Украинанинг сунъий йўлдош тасвирлари 2023 йилнинг кузида олинган. “РБК” нашрининг ёзишича, ҳозирда Google Maps’да Киевнинг Жуляни аэропортидаги ҳаво ҳужумидан мудофаа тизимларини, шунингдек, Хмелницкий вилоятидаги Старконстинатиново аэропорти ҳудудидаги самолётлар ва бошқа объектларни кўриш мумкин.
