Эрон миллий жамоаси бош мураббийи: «Биз танқидни қабул қиламиз, аммо ғаразни эмас»
Эрон миллий жамоаси бош мураббийи Амир Ғалиноий Ўзбекистонга қарши ўйиндан кейин ўз фикрлари билан ўртоқлашди.
«Бу йўлланма билан Эрон халқини табриклайман. Бу энг кичик ишимиз эди. Бизнинг ишимиз эртадан бошланади ва биз Жаҳон чемпионатининг кейинги босқичига чиқишимиз керак».
У сўзини давом эттириб: «Оиламга, ОАВ ва футбол федерациясининг собиқ раҳбарияти аъзоларига миннатдорлик билдираман. Бу ўйин уч ёки тўртта гол фарқи билан Эрон ғалабаси билан якунланиши керак эди, лекин халқимизни хурсанд қила олганимиздан хурсандман», — деди.
Миллий жамоа бош мураббийи қўшимча қилди:
«Баъзи дўстлар жамоани ўрганмасдан ва шахсий адоват билан танқид қилишди. Биз танқидни қабул қиламиз, аммо ғаразни эмас. Илтимос қиламан, агар мен, Амир Ғалиноий билан муаммонгиз бўлса, бу футболчиларнинг меҳнатини савол остига қўйманг».
