Суд Йозеф Блаттер ва Мишель Платинини коррупция иши бўйича яна оқлади
Швейцариянинг Муттенц шаҳридаги Федерал жиноий суднинг фавқулодда апелляция суди ФИФА собиқ президенти Йозеф Блаттер ва УЕФА собиқ президенти Мишель Платинини коррупция айбловлари бўйича оқлади, деб хабар бермоқда Reuters.
2022 йилда Блаттер ва Платини қуйи суд томонидан оқланган, бироқ Швейцария прокуратураси қарор устидан шикоят қилганди.
«Иккита оқлов ҳукмидан сўнг, ҳатто Швейцария Бош прокуратураси ҳам бу жиноий ишларнинг бутунлай барбод бўлганини тушуниши керак», — деди Платинининг адвокати Доминик Неллен.
Прокуратура собиқ футбол амалдорларини фирибгарлик, ҳужжатларни қалбакилаштириш, ўзлаштириш ва мансаб ваколатларини суиистеъмол қилишда айблаганди. Иш Платини 2011 йилда ФИФАдан 1998 йилдан 2002 йилгача консальтинг хизматлари учун тўлов сифатида олган 2 миллион швейцария франки (2,26 миллион доллар) тўловига тааллуқли эди.
Тергов маълумотларига кўра, тўлов ноқонуний бўлган ва Блаттер ҳамда Платини ФИФАни алдаган. «Улар [Блаттер ва Платини] ФИФА Платинидан қарзи борлигини ёки Платини консальтинг иши учун 2 миллион швейцария франки олиш ҳуқуқига эга экани ҳақида ёлғон даъво қилди. Бу алдов ҳар икки судланувчи томонидан бир неча бор ёлғон баёнотлар бериш орқали амалга оширилган», — дейилади айблов хулосасида.
Бироқ Блаттер Платини билан оғзаки келишувга эришганини ва тўлов 2011 йилгача кечиктирилганини, чунки ФИФАда ўша пайтда етарли маблағ йўқлигини айтди.
Суд Блаттер ва Платинининг ёнини олиб, тўлов бўйича оғзаки келишув эҳтимолини инкор этиб бўлмаслигини ва тўлов миқдори Франция терма жамоасининг собиқ сардори ва мураббийи Платинининг тажрибаси билан изоҳланишини айтди.
Тергов 2015 йилда бошланган ва Блаттер ҳамда Платини ўз лавозимларидан истеъфога чиққан эди. ФИФАнинг Этика қўмитаси иккаласини ҳам саккиз йилга дисквалификация қилган, бироқ кейинроқ муддат қисқартирилганди.
