Тинч океанида автоуловлар билан тўлган кема ҳалокатга учради
Тинч океанида Morning Midas номли юк кемаси, бортида минглаб автомобиллар билан бирга, бутунлай чўкиб кетди. Бу ҳақда Bloomberg ахборот агентлиги хабар берди.
Кемада тахминан 3 мингта автомобиль, жумладан 800 та электромобил бўлган. Юк машиналари Хитойнинг машҳур автомобиль ишлаб чиқарувчилари — Chery Automobile ва Great Wall Motor компанияларига тегишли бўлиб, Мексикага етказилиши керак эди.
Morning Midas кемасида ёнғин июнь ойининг бошида бошланган. Ёнғин оқибатида кучли шикастланган кема очиқ денгизда, қирғоқдан тахминан 579 километр узоқликда ташлаб кетилган. Кемани бошқарувчи Zodiac Maritime компаниясининг баёнотига кўра, об-ҳавонинг ёмонлашуви ва ёнғин оқибатидаги шикастлар натижасида кема 23 июнь куни чўкиб кетган.
Ёрдамга юборилган учта махсус кеманинг иккинчиси ҳодиса жойига фақат 15 июнь куни, ёнғин бошланганидан бир ҳафтадан ортиқ вақт ўтиб етиб борган.
Бу ҳодиса атроф-муҳит мутахассисларини хавотирга солмоқда. Чунки бортдаги электромобиллар, аккумуляторлар ва бошқа зарарли моддалар сувга тушган бўлиши мумкин.
Шу ўринда эслатиб ўтамиз, яқинда Мянма соҳиллари яқинида ҳам оғир кемаларнинг чўкиши ҳолатлари қайд этилган эди. Унда 400 дан ортиқ роҳинжа мусулмонлари ҳаётдан кўз юмди. Улар Бангладешдаги Cox’s Bazar қочқинлар лагерлари ёки Мянмадаги Рахайн штатидан қочаётган бўлган.
