Абитуриентлар учун муҳим хабар: Рухсатномалар олиш бошланди!

2025-2026-ўқув йилида олий ва профессионал таълим муассасаларига кириш учун онлайн рўйхатдан ўтган абитуриентларга “Абитуриент рухсатномаси”ни бериш бошланди. Бу ҳақда Олий таълим вазирлиги хабар берди.

Маълум қилинишича, абитуриентлар тест синовларида иштирок этиш учун “Абитуриент рухсатномаси”ни my.uzbmb.uz сайтига шахсий идентификация рақами ҳамда паспорт серияси ва рақамини киритган ҳолда олиши мумкин.

Абитуриентлар тест синовига паспорт (ID-карта) ва абитуриент рухсатномаси билан белгиланган вақтдан кечикмаган ҳолда келиши лозим.

Паспорт нусхаси ёки бошқа ҳужжатлар билан келган, шунингдек, кечикиб келган абитуриентлар тест синовларига киритилмайди.

Маълумот учун, 2025/2026-ўқув йилида Ўзбекистон олий таълим муассасаларининг бакалавриатига кириш имтиҳонлари учун 732 411 нафар абитуриент онлайн рўйхатдан ўтган.