Axios: АҚШ Украинага кучли босим ўтказяпти
Вашингтон Киевдан Россия томони талаб қилаётган ҳудудларнинг бир қисмини расман беришга тайёрлигини билдиришни сўраяпти.
Бу ҳақда Axios нашрига украиналик икки расмий маълум қилган.
Манбаларнинг айтишича, АҚШ Украинага нисбатан босимни Россияга қараганда кучлироқ қўлламоқда. Айниқса, Зеленскийдан аниқ ҳудудий воз кечишларга розилик талаб қилиняпти. АҚШ президентининг махсус вакили Стив Уиткофф ва Дональд Трампнинг куёви Жаред Кушнер билан телефон орқали суҳбатда Вашингтон Киевни шундай қарорга ундаган.
«Турли йўллар билан бизга Россиянинг бутун Донбассни эгаллаш ниятини қабул қилдиришга уринишди. АҚШ томони Зеленскийдан шуни суҳбатдаёқ қабул қилишини истагандек туюлди», – дейди манбалардан бири.
8 декабр куни ана шу босим ҳақида France24 телеканали ҳам AFP маълумотларига таяниб хабар берди. Манбага кўра, АҚШ Украинага айни масалада тезроқ бир қарорга келишни хоҳлаб, босимни кучайтирган. Бироқ Украина «барча шартларни деталлаштирмасдан қабул қилиб бўлмаслигини» маълум қилган.
Кузатувчиларнинг фикрича, Трамп маъмурияти учун урушни тезда тугатиш – геосиёсий устувор мақсад бўлиб турибди. Москва эса Донбасс бўйича талабларидан қайтмаяпти. Шу сабаб АҚШ Киевни «музокаравий юмшоқликка» чақираётган бўлиши мумкин.
Украина томони эса йирик ҳудудий воз кечишларни тайёргарликсиз қабул қилиб бўлмаслигини таъкидламоқда.
