Ҳайрат: сеҳр-жодуга ишонган футболчининг ўзи уни қурбони бўлди?..
Футбол дунёси ҳам кутилмаган ва ғайриоддий воқеаларга бой. Масалан, Бурунди футболи ва умуман Африка спорт жамоатчилиги кутилмаган ва фожиали йўқотишдан ларзага келган. Мамлакат иккинчи дивизиони вакили, истеъдодли футболчи Игира Неза Эме Герик ўйин вақтида ҳаётдан кўз юмди. Ушбу воқеа нафақат спортдаги хавфсизлик, балки майдондаги турли хурофот ва маросимларнинг оқибатлари ҳақида жиддий мунозараларни келтириб чиқарди. Ўйиннинг қизғин палласида 22 ёшли футболчи кутилмаганда майдон марказида нафас қисиши натижасида йиқилган. Гувоҳларнинг ва кейинчалик тиббий хулосаларнинг таъкидлашича, Герик ўйин олдидан ёки ўйин давомида ўзига хос «омад келтирувчи» маросимни ўтказган. У оғзига кичик ўлчамдаги танга ёки маҳаллий анъаналарга хос бўлган сеҳрли тумор солиб олган. Ўйин давомидаги жисмоний фаоллик натижасида мазкур буюм унинг нафас йўлига тиқилиб қолган. Бу эса асфиксия (бўғилиш) ҳолатига олиб келган.
Майдондаги шифокорлар дарҳол биринчи ёрдам кўрсатишга киришганлар. Бироқ, нафас йўлларининг ёт жисм билан тўлиқ тўсилиб қолиши миянинг кислородсизланишига (гипоксия) сабаб бўлган. Футболчи шифохонага олиб кетилаётган вақтда, тез ёрдам машинасида вафот этган. Бурунди футбол федератсияси футболчининг вафоти ҳақида таъзия билдирган, бироқ ўлимнинг аниқ сабаби (танга тиқилгани ёки йўқлиги) ҳақида расмий, очиқ тиббий хулоса эълон қилинмаган. Бу эса воқеа атрофида турли миш-мишлар кўпайишига сабаб бўлган.
Ушбу воқеа Африка футболида чуқур илдиз отган «Жужу» (маҳаллий афсун ва сеҳр-жоду) масаласини яна бир бор кун тартибига чиқарган. Кўплаб футболчилар майдонга махсус туморлар билан тушиш, дарвоза устунларига турли нарсалар боғлаш, рақибга нисбатан «психологик босим» ўтказиш учун оғизда ёки кийимда турли ашёларни сақлаш каби амалларга ишонишади.
Гарчи бу ҳаракатлар шахсий ишонч билан боғлиқ бўлса-да, ФИФА ва CAF (Африка Футбол Конфедерацияси) қоидалари футболчиларнинг хавфсизлиги учун майдонда ҳар қандай заргарлик буюмлари, металл ашёлар ва хавфли предметларни тақишни қатъиян ман қилади.
