Бўлиб тўлаш маркетинги — бизни жар ёқасига етаклаётган ширин ёлғон
Маркетинг бўйича мутахассис Бекзод Касимов ёзмоқда:
Бугун Ўзбекистондаги маркетинг кампанияларининг 90% и «кредит консалтинг»дан иборат. Агар маҳсулотингиз рекламасидан «рассрочка» деган сўзни олиб ташласак, сотишингизга кўзингиз етадими? Ҳамма жойда «Муддатли тўлов», «Бошланғич тўловсиз», «Битта паспорт эвазига».
Биз мижозни маҳсулотнинг қийматига эмас, унинг «бўлиб ташланган» нархига ўргатиб қўйдик. Бу — маркетинг эмас, бу — ўзини ўзи чоҳга отиш. Нега бу «балодан» қочиш керак?Премиум мижозларнинг «кўчиши»: Нақд пули бор, тўлов қобилияти юқори мижозга сизнинг «арзон кредитингиз» қизиқ эмас. Аксинча, ҳадеб «камбағалбоп» реклама бераверсангиз, брендингиз премиум аудитория учун ўз жозибасини йўқотади.
Улар «ҳаммага бериладиган» нарсани олишни хоҳламайди. Пул қадрининг ўлиши: Ҳамма нарсани келажакдаги пул ҳисобига олиш — бу бугунги реал талабни сунъий шиширишдир. Натижа? Инфляция баттар кучаяверади. Муаммоли кредитлар бомбаси: Маркетерлар «Лид-магнит» деб ҳамма келди-кетдини чақираверади. Қиммат маҳсулотни пули етмайдиган мижозга сотавериш оқибатида триллионлаб суммада муаммоли кредитлар пайдо бўлади. Муаммоли кредитлар ботқоғи марказий банк ставкаларининг ошишига, бу эса ўз навбатида кредит фоизларининг яна ҳам тепароқга кўтарилишига олиб келади. Маркетерларга «шафқатсиз» маслаҳат: Агар сизнинг креативлигингиз фақат «муддатли тўлов» фоизларини ўйнатишга етаётган бўлса — соҳани алмаштиринг. Мижозни сервис билан ушланг.
Мижозни статус билан ишланг. Мижозни муаммосига ҳақиқий ечим бериш билан ишланг.
Нарх билан ўйнашишни ҳамма эплайди. Қиймат яратишни эса фақат ҳақиқий маркетологлар билади. Биз қачон «Ойлик тўлови қанча?» деган саволдан «Сифати қандай?» деган саволга ўтамиз? Ёки бозор ўлмагунча тўхтамаймизми?
