Чехияда президентни қўллаб-қувватлаш мақсадида яна митинглар бўлиб ўтди — Deutsche Welle
Президент Петр Павел ва ўнг қанот, евроскептик бош вазир Андрей Бабиш ўртасидаги можаро кескинлашгани фонида Чехиянинг 400 дан ортиқ аҳоли пунктларида одамлар кўчаларга чиқди. Мамлакатнинг аҳоли сони бўйича иккинчи йирик шаҳри Брнодаги намойишда 8 мингдан 10 минггача киши иштирок этди.
1 феврал куни Павелни қўллаб-қувватлаш акцияси Прагада ҳам ўтказилганди. Ташкилотчилар баҳосига кўра, унда қарийб 90 минг киши қатнашган.
Павел ва Бабиш ўртасидаги можаро президентнинг “Автомобилчилар ўзлари учун” партияси фахрий раиси Филип Турекни атроф-муҳит вазири лавозимига тайинлашдан бош тортганидан сўнг авж олди. Павел бу қарорини Турекнинг демократик давлатда вазир лавозимига номувофиқ номзод экани билан изоҳлаган.
Турекнинг тайинланиши рад этилгач, Бабиш ҳукуматидаги ташқи ишлар вазири Петр Мацинка Павелнинг ёрдамчиси билан ёзишмаларда “муносабатларни бутунлай узиш” билан таҳдид қилган. Президент ёзишмаларнинг скриншотларини эълон қилиб, Мацинкани босим ўтказишга ва шантаж қилишга уринишда айблади.
