Солиқчилар! Қани, бошладик бўлмасам! Ана, Юлдуз Усмонова опам шундай дедилар!..

«Агар биз солиқ тўлайдиган бўлсак, ўзларинг чиқиб қўшиқ айтинглар, тўйларни ўтказинглар», — дебдилар… Унда ҳозирдан тайёргарликни бошлаб юборамиз! Ҳозир қўшиқ айтиш унчалик қийин эмас. Сунъий интеллектнинг ўзи ҳамма нарсани ясаб ташлайди. Сиздан битта расм бўлса кифоя. У ёғига тренддаги мусиқа, тренддаги клип ва тренддаги сўзлар тайёр.

Фақат сиз билан биз саҳнага чиқиб олиб, «такой» кийимларда оғзимизни қимирлатиб, тиржайиб турсак бўлди… Кейин бизни иззат-икром билан тўйхонадан кузатиб қўйишаётганида, тўйхона эшиги ёнида дафтарини қучоқлаб турган солиқчига «қисмлар»ни ёки «келишилганлар»нинг ярмини ташлаб кетаверамиз. Қарабсизки, ошиғимиз олчи!

Бу ерда биз икки томонлама ютамиз: биринчидан — текинга қорнимиз тўяди, иккинчидан — «соққали» бўлиб оламиз. Яна кейинги тўйга бўладиган мотивацияни айтмайсизми?!