Мадагаскарда “Гезани” циклини қурбонлари сони 59 нафарга етди
10–11 февраль кунлари орол ҳудудидан ўтган тропик “Гезани” циклини оқибатида ҳалок бўлганлар сони 59 нафарга кўпайди. Бу ҳақда Мадагаскар Табиий офатлар хавфини бошқариш миллий бюроси маълум қилди.
Маълумотга кўра, циклон мамлакатнинг 5 та ҳудудидаги 25 туманга таъсир кўрсатган. 15 киши бедарак йўқолган, 804 нафар жароҳат олган. Жабрланганлар умумий сони 423 минг нафардан ошган.
Аввалроқ 43 нафар ҳалок бўлгани хабар қилинган эди. Кейинчалик Мозамбикка кўчган циклон оқибатида у ерда ҳам тўрт киши ҳалок бўлган.
Бугун Мадагаскар ҳукумати “Гезани”нинг яна яқинлашаётгани муносабати билан қизил хавф даражасини эълон қилди. Жануби-ғарбий ҳудуд аҳолисига уйларини тарк этмаслик, кемаларга эса портларда қолиш тавсия этилди.
