Ҳа, агар шундай қилсангиз эрингиз аниқ хизматкорингизга айланади!..

Яқинда интернетда бир мотиватор опанинг маърузасини эшитиб қолдим. Чой ичиб тургандим, чойим томоғимга тиқилиб қолди. Опа худди Голливуд фильмидан чиқиб келгандек, кўзларини сузиб шундай дейди: — «Ҳурматли аёллар! Эрингиз ишдан келишига сувда чайиниб, энг қимматбаҳо кўйлакларингизни кийиб, Француз атирларидан сепиб, ўзингизга оро бериб кутиб олинг! Шунда эрингиз атрофингизда парвона бўлиб қолади…»

Шу гапни эшитдим-у, бир зумга кўзимни юмиб, ўзимни қишлоқдаги келинлик уйимда тасаввур қилдим. Тасаввур қиламан-у, кўз олдимдан «жангари» кадрлар ўта бошлайди:

1. «Француз атири» эмас, «Молхона шабадаси»

Опа айтгандек, атир сепиб кутиб олишим керак… Лекин менинг «атирим» табиий! Кечқурун молхонадан чиққан келинчакдан «Chanel №5» эмас, «Сигир №1» ифори келиб туради. Эрим ишдан келганда мени ҳидлаб кўриб: «Оҳ, мана шу ифор мени маст қилади, ўзимизни Тўқлихоннинг ҳиди келяптими?» деб ўзидан кетиб қолса керак.

2. «Янги кўйлак» ва «Чанг-тўзон» гармонияси

Янги кўйлакни кийиб, «подиум»да юришим керак экан. Аммо менинг подиумим — ошхона билан молхонанинг орасидаги чанг кўча. Бир қўлимда ўтин, бир қўлимда овқатнинг чўмичи… Кўйлакнинг этагига ёш болалар ёпишган, орқадан қайнонам: «Ҳой келин, эртагача чигит титиб қўйинг!» деб қараб турибди.

3. Этикка пул йўқ-у, «парвона» бўлишни ким қўйибди?

Опа «эрингиз парвона бўлади» дейди. Менинг эрим ишдан келиб, этик олишга пул йўқлигидан, тешилган маҳси-калишда юрганимни кўриб, ўзи «парвона» бўлиб уча бошлайди. Фақат мени эркалаб эмас, «Нимага бугун сигирга вақтида сув бермадинг?» деб жаҳл билан чир айланади.

Қишлоқча «Мотивация»

Бу опалар фалон пулга айтаётган маслаҳатларини биз қишлоқда текинга «амалиётда» қўллаймиз:

• Юзни парвариш қилиш: Иссиқ тандирнинг олдида 15 дақиқа турсангиз, юзингиз шунақа қизарадики, ҳеч қандай «румяна» керак эмас!

• Ароматерапия: Гўнг чиқариш — бу антиқа стрессга қарши муолажа.

• Фитнес: Бир кунда 20 марта ўтин ташиш ва 5 маҳал сигир соғиш — энг зўр тренажёр зали!

Хулоса: Мотиватор опажон! Бизнинг қишлоқда эримизни «жалб қилиш» учун атир шарт эмас. Иссиққина нон ёпиб, чойни аччиқ дамлаб, «Дадаси, чарчамадингизми?» деб турсак — эримиз учун биздан гўзали йўқ. Фақат… ўша маҳси-калишни янгилаб олсак бўлди эди!

Азиз аёллар, маслаҳат текин, лекин қишлоқнинг шароити ундан ҳам «қиммат»!