Бу шўрлик яхшилик қилмоқчи эди!.. Аммо…
Трампга ўқ узган шахс умрбод қамоқ жазосига ҳукм қилиниши мумкин: Трамп янги суиқасддан ўз манфаати йўлида фойдаланиши кутилмоқда
Вашингтонда АҚШ президенти Дональд Трампнинг яна бир ашаддий душмани судга олиб келинди. Ўтган дам олиш кунлари Трамп иштирокидаги тадбирда отишма содир этган Коул Алленга нисбатан расмий айблов эълон қилинди. Эндиликда у умрбод қамоқ жазосига маҳкум этилиши мумкин.
Матбуот воқеа тафсилотларини босқичма-босқич тикламоқда: ўқ овозлари эшитилганда хаос бошланган, қўриқчилар саросимага тушиб қолган. Агар Трампни ҳақиқатда ўлдирмоқчи бўлишган бўлса, у фақат мўъжиза туфайли омон қолган.
Жиноят тафсилотлари
Тергов хулосасига кўра, Калифорниялик 31 ёшли Коул Аллен давлатнинг биринчи шахслари ва маъмурият мулозимларига ҳужум қилишни олдиндан ва пухта режалаштирган. У ҳатто тантанали кечки овқат бўлиб ўтадиган меҳмонхонадан хона банд қилган.
Жума куни эрталабгача «умидли ёш ўқитувчи» деб таърифланган Аллен, бугун АҚШдаги энг хавфли одамга айланди. Дробовик, тўппонча ва пичоқлар билан қуролланган жиноятчи Оқ уй мухбирлари ассоциацияси аъзолари ва муҳим сиёсатчилар Трамп иштирокидаги қабулга кирадиган зинапоя олдида ўт очган. У хавфсизлик ходимлари ёнидан югуриб ўтиб, конференция залига киришдагина тўхтатиб қолинган. У бир неча марта ўқ узишга ҳам улгурган.
Хавфсизлик хизматининг муваффақиятсизлиги
Отишма бошланганда залда тартибсизлик юзага келди. Махсус хизматлар негадир аввал вице-президент Жей Ди Вэнсни олиб чиқиб кетишган ва шундан кейингина Трампни эслашган. Ҳатто бир вазиятда президентни йиқитиб юборишларига бир баҳя қолган.
Оқ уй матбуот котиби, ҳомиладор Кэролайн Ливитт стол тагига яширинишга мажбур бўлган. Бу Трампга нисбатан уюштирилган учинчи ҳужумдир ва энди қўриқчиларнинг малакаси борасидаги саволлардан қочиб қутулиб бўлмайди. Ҳатто жиноятчининг ўзи ҳам бино атрофида қўриқчилар йўқлигидан ва ягона металлодетектор фақат зал киришига ўрнатилганидан ҳайратда эканини айтган.
Сиёсий манфаат: Рейтингни кўтариш имконияти
Бироқ Трамп ушбу янги суиқасддан ўз фойдаси йўлида фойдаланиши мумкин. Эрон билан бўлаётган унчалик машҳур бўлмаган уруш фонида унинг рейтинги 39 фоизгача тушиб кетган эди. Олдинда эса оралиқ сайловлар турибди.
Энди президент яна диққат марказида. Жиноятчи эса демократлар тарафдори бўлиб чиқди. Демак, Трамп яна рақибларини экстремистик кайфиятларни қўзғатишда айблаши мумкин. Зеро, бундан олдинги иккита ҳужум ижрочилари ҳам демократларни қўллаб-қувватлаган эди.
