Шакира концерти миллионлаб мухлисларни жамлади, Пике танқид остида қолди
Шакиранинг Рио-де-Жанейро шаҳрида ўтказилган бепул концерти катта шов-шувларга сабаб бўлди. Тадбир давомида йиғилган миллионлаб мухлислар собиқ футболчи Жерар Пикега қарши ҳақоратли шиорлар айтган.
“Dzen” нашрининг хабар беришича, концертга тахминан икки миллионга яқин одам тўпланган. Шакира саҳнада чиқиш қилаётган вақтда у шахсий ҳаётига оид кинояли мурожаат билан ҳам чиқиш қилган.
У ўз нутқида Бразилияда кўплаб ёлғиз оналар борлигини ва уларнинг оиласи учун тинимсиз меҳнат қилишини таъкидлаган. Санъаткор ўзини ҳам шундай аёллардан бири сифатида тилга олган.
Шундан сўнг, томошабинлар орасида кайфият кескин ўзгариб, Пике номига нисбатан турли норозилик ва ҳақоратли чақириқлар янграй бошлаган.
Маълумот учун, Шакира ва Пике ўртасидаги ишқий муносабатлар 2010 йилда бошланган. 2012 йилда эр-хотиннинг биринчи фарзанди Милан, яна икки йилдан сўнг эса иккинчи ўғли Саша дунёга келди. Бироқ, 2022 йилда хонанда футболчини хиёнатда айблаб, у билан муносабатларни узган. Ажралганидан олти ой ўтгач, у собиқ севгилиси ва унинг янги севгилисини танқид қилган композицияни чиқарди. Ҳозирда Шакира болалари билан Маямида яшайди.
«Барселона» клуби ҳимоячиси Жерар Пике профессионал фаолиятини «Манчестер Юнайтед»да бошлаган. У, шунингдек, «Реал Сарагоса»га ижарага берилган ва 2008 йилда яна Каталония клубига қайтган ва у ерда 2022 йилда футболчилик фаолиятини якунлагунга қадар қолган.
