Хотинини ўлдириш учун 10 минг долларга киллер ёллаган эркак ушланди
Пойтахтда ҳуқуқ-тартибот идоралари ходимлари томонидан қотилликка уринишнинг олди олинди. Бу ҳақда Тошкент шаҳар ИИББ матбуот хизмати хабар берди.
Маълум бўлишича, 1985 йилда туғилган эркак ўзининг фуқаровий хотинини йўқ қилиш учун қотил ёллаган. «Иш» учун у 10 минг доллар ваъда қилди: 2 минг долларни аванс сифатида берди, қолган суммани буюртма бажарилгандан кейин тўлашни режалаштирган.
Қотилликни қандай усулда амалга ошириш кераклиги ҳақидаги саволга эркак «бўғиб ўлдириш» деб жавоб берди.
Вазиятга ўз вақтида ҳуқуқ-тартибот идоралари ходимлари аралашишди – улар ижрочи ва гумон қилинаётган жабрланувчини ҳамкорлик қилишга ва жиноятни саҳналаштиришга кўндиришди.
Қолган 8 минг доллар ва иккинчи аёлга тегишли Tracker автомашинасини топшириш вақтида гумонланувчи ва ижрочи қўлга олинди.
Тергов маълумотларига кўра, эркакнинг иккита хотини бўлган. У иккинчисини таъминлаганини, бироқ унинг сўзларига кўра, унга «ҳар доим камлик қилганини» айтди. Ярим йил олдин биринчи хотини бундан хабар топиб, агар у муносабатларни тўхтатмаса, болалари билан бирга тўртинчи қаватдан ўзини ташлаши билан таҳдид қилган.
Бошқа чора тополмаган эркак қотилликка буюртма беришга қарор қилган.
Ҳолат юзасидан буюртмачи ва ижрочига нисбатан ЖКнинг 97-моддаси (қасддан одам ўлдириш) билан жиноят иши қўзғатилган. Ҳар икки шахсга нисбатан қамоққа олиш тарзидаги эҳтиёт чораси қўлланилган. Тергов ҳаракатлари олиб борилмоқда.
