Эрон ундайгаям, бундайгаям ураяпди!..
Эрон «нефт экспортига тўсқинлик қилгани» учун Ocean Koi нефт танкерини қўлга олди
Эрон Барбадос байроғи остида сузаётган Ocean Koi нефт танкерини қўлга олди. Бу ҳақда 8 май куни Tasnim агентлиги ўз Telegram-каналида хабар берди.
Нашр маълумотларига кўра, кема «нефт экспортига халақит беришга ва Эрон миллати манфаатларига зарар етказишга уринган». Fars агентлигининг аниқлик киритишича, операцияда Эрон Ҳарбий-денгиз кучларининг махсус топшириқли бўлинмалари ва денгиз пиёдалари иштирок этган.
Эрон ОАВлари тарқатаётган кадрларда Ислом Республикаси ҳарбийлари кемани қўлга олиш бўйича операция ўтказаётганини кўриш мумкин: улар танкерга сузиб бориб, ичкарига киришган ва кема мачтасига Эрон байроғини ўрнатишган. Fars хабарига кўра, кема мамлакатнинг жанубий соҳилларига шатакка олиб кетилган.
АҚШ Президенти Дональд Трамп ўтган куни Американинг учта замонавий эсминцери Ҳурмуз бўғозидан ўтганини маълум қилган эди. У тўқнашув давомида Эроннинг кўплаб кичик кемалари йўқ қилинганини таъкидлади. Трампнинг сўзларига кўра, Эрон Америка эсминцерларига қарата ракеталар ва учувчисиз учиш аппаратларини (БПЛА) учирган.
Шу куннинг ўзида Эроннинг IRIB давлат телекомпанияси ҳарбий разведка вакилига таяниб, Эрон Қуролли кучлари Ҳурмуз бўғозида АҚШ кемасига қарата ракеталар отганини хабар қилди. IRIB маълумотларига кўра, бу ҳаракат Американинг Эрон нефт танкерига қилган ҳужумига жавобан амалга оширилган.
