Путин Европа билан музокарага киришиш шартини айтди
Россия президенти Владимир Путин Москва Европа Иттифоқи билан музокара олиб боришга рози экани, аммо бунинг учун Европадан Россияга қарши «турли бўлмағур гаплар»ни айтмаган шахс музокарачи сифатида юборилиши кераклигини айтди.
«Шахсан мен (музокарачи сифатида) Германия Федератив Республикаси собиқ канцлери жаноб Шрёдерни афзал кўрган бўлардим», – деган Путин.
Москва музокарачи сифатида немис сиёсатчиси Герҳард Шрёдерни маъқул кўргани Европада хавотир билан қаршиланди.
Хусусан, Германия томони Путиннинг бу ташаббусини «сохта таклифлар туркуми»нинг бир қисми деб баҳоламоқда.
Немис ҳукумати бу таклифга эҳтиёткорлик билан муносабат билдирган ва Путиннинг сўзларини «маълумот учун қабул қилгани» ни айтиш билан чекланган.
Германия матбуоти эса Шрёдернинг воситачи бўлиши ҳақидаги таклифни очиқ-ошкора танқид қилган.
«Германиянинг собиқ канцлери узоқ вақт мобайнида Россия қарамоғида бўлган (Шрёдер канцлерликдан кетгач, узоқ йиллар мобайнида Россия ширкатларида ишлаб, рус ҳукуматидан маош олгани назарда тутилмоқда – таҳр.). Демак, у Киев ва Москва, шунингдек, Европа ва Москва ўртасида бетараф воситачи бўла олмайди. Шрёдер – Путиннинг одами. Лавозимдан кетгач, у катта пул эвазига Россия фойдасига ишлагани уни бугун дипломат бўлиш ҳуқуқидан маҳрум этади», – деб ёзган Frankfurter Allgemeine Zeitung газетаси.
Süddeutsche Zeitung нашри ҳам Шрёдер ҳақидаги таклифни Путиннинг Европада саросима ва нотинчлик уйғотишга қаратилган манипуляцияси деб атаган. Бу ҳол Москва билан музокаралар мураккаб ва мушкул кечишини ҳам англатади.
Социал-демократлар партияси вакили бўлган Г.Шрёдер 1998-2005 йилларда канцлер вазифасида фаолият юритган. Ҳукумат бошлиғи курсисидан кетганидан буён Россиянинг йирик энергетика ширкати ؘ– «Роснефт» директорлар кенгаши раҳбари лавозимида фаолият юритиб келади. Украинага босқин ортидан Шрёдернинг Кремль манфаатларига қаратилган фаолиятига нисбатан норозилик кучайган.
Олмон матбуоти кўпдан буён Шрёдерни кремлпарастлиги билан амалдаги ҳукуматни ўнғайсиз ҳолатга солаётгани, фақат шахсий манфаатларини кўзлаётганини танқид қилмоқда.
Олмон жамоатчилиги ҳам собиқ ҳукумат раҳбарининг Украинани хонавайрон қилаётган сиёсатчи билан дўстлигидан хурсанд эмас. Ҳатто Германиядаги айрим қаҳвахоналар Шрёдер ва рафиқасининг киришини тақиқлаган.
2014 йилда Шрёдер Санкт-Петербургда 70 йиллик юбилейини нишонлаган ва тантанада шахсан Путин қатнашган эди. Россия–Украина зиддияти авжига чиққан кунлар собиқ канцлернинг Ғарб рақиб ўлароқ кўрадиган давлатда байрам қилиши Германия жамоатчилигининг кескин эътирозига сабаб бўлган эди.
2018 йили Путиннинг навбатдаги инаугурация лавозимида Шрёдер иштирок этган ва Россия президентининг хос аъёнлари қаторида – патриарх Кирилл ва Дмитрий Медведев билан ёнма-ён турган эди. Ўшанда ҳам олмон матбуоти ўзини хорижий давлат раҳбарининг мулозими каби тутаётган собиқ канцлерни кескин қоралаганди.
2022 йилда собиқ канцлер Шрёдер Путин билан дўстона муносабатлар ҳамда Россия ширкатларидаги мўмай даромадли лавозимдан воз кечмаётгани сабабли айрим расмий имтиёзлардан маҳрум этилган.
