АҚШнинг Россия нефтига қарши санкциялари қайта кучга кирди – Bloomberg
Қўшма Штатлар маъмурияти Россия нефтига қарши жорий этилган санкциялар чекловларини вақтинча тўхтатиб туриш муддатини узайтирмади. Шунингдек, санкциялар 16 майдан – мамлакатларга Россиядан санкция остидаги энергия ресурсларини сотиб олишга рухсат берувчи истиснолар муддати тугаган кундан бошлаб яна кучга кирди.
Март ойида Вашингтон АҚШ ва Исроилнинг Эрон билан уруши фонида нефт нархининг ошишини секинлаштириш мақсадида, Москванинг Киевга ҳужуми сабабли киритилган санкцияларни қисман тўхтатиб турган эди. Ўшанда АҚШ Молия вазирлиги кемаларга юклаб бўлинган нефтни сотиб олишга 30 кунга рухсат берганди.
Ушбу муддат 11 апрелда тугаши керак эди, бироқ Қўшма Штатлар маъмурияти рухсатномани яна 16 майгача узайтирди. 11 апрелдан бир оз олдин АҚШ Молия вазири Скотт Бессент давлатларга Вашингтон санкцияларидан қўрқмасдан Россия нефтини сотиб олиш имконини берган ушбу рухсатнома муддати бошқа узайтирилмаслигини ваъда қилган эди.
Bloomberg агентлигининг қайд этишича, Европа давлатлари санкцияларнинг тўхтатиб турилишига қарши чиқишган, чунки бундай чоралар Украинага қарши урушини нефт сотишдан тушган даромадлар ҳисобидан молиялаштираётган Россияга нисбатан босимни сусайтиради.
Бироқ, баъзи давлатлар, жумладан Ҳиндистон ва Индонезия Трамп маъмуриятини чекловларни тўхтатиб туриш муддатини узайтиришга кўндиришга уринишди, чунки Ҳўрмуз бўғозининг блокланиши жаҳон бозорларини нефт маҳсулотларининг катта қисмидан маҳрум қилди, деб ёзади агентлик.
