ЖЧ олдидан Каннаваро ва футболчилар нималар дейишмоқда?
Ўзбекистон миллий терма жамоаси ўз тарихида илк бор Жаҳон чемпионатида иштирок этиш остонасида турибди. Мундиал олдидан жамоанинг тайёргарлик жараёни, бош мураббий Фабио Каннаваронинг тактик қарашлари ва жамоа аъзоларининг баёнотлари ўзбек футболи жамоатчилиги марказида бўлиб турибди.
Каннаваро таркибни шакллантиришда футболчиларнинг нафақат клубдаги, балки терма жамоа йиғинидаги ҳолатига алоҳида эътибор қаратмоқда. Бу борада “Динамо” ҳужумчиси Азизбек Амоновнинг миллий жамоага жалб этилиши кўпчилик учун кутилмаган ҳолат бўлди. Каннаваронинг сўзларига кўра, Амонов уч ҳафталик йиғин давомида мураббийлар штабини ҳайрон қолдира олган. Мураббий футболчининг клубдаги ва терма жамоадаги ўйини ўртасида катта тафовут борлигини, Азизбек машғулотларда ўзини кўрсата олгани учун сўнгги кунда якуний қарор қабул қилинганини таъкидлади.
“Биз йиғиндаги футболчиларнинг уч ҳафта давомида ўзларини қандай кўрсатишганини таҳлил қилдик. Улар машғулотларда қандай иштирок этишди ва бизга ўзларини қандай кўрсата олишди. Мисол учун, биз Жасурбек ҳақида, Азиз ҳақида гаплашдик. У бор-йўғи биринчи марта миллий жамоа сафига қўшилди. Уч ҳафта давомида биз билан ишлади ва мен ҳайрон қолдим. Тўғри, мен уни чемпионат доирасидаги ўйинларда кўргандим, лекин футболчининг клубида кўрсатаётган ўйини ва терма жамоадаги ўйинчилар билан кўрсатаётган ўйини орасида тафовут катта. Биз бу кўрсаткичлардан келиб чиқиб, сўнгги кунда қарор қабул қилдик”, – деди мураббий.
Терма жамоанинг энг истиқболли ҳимоячиси ҳисобланган, Пеп Гвардиола қўл остида “Манчестер Сити”да тўп сурган 22 ёшли Абдуқодир Ҳусанов ҳамм мураббийнинг алоҳида эътиборида турибди. Каннаваро Ҳусановнинг салоҳиятини юқори баҳолаган ҳолда, унинг ўйинидаги баъзи камчиликларга ҳам тўхталиб ўтди. Хусусан, италиялик мутахассис ҳимоячидан ўйин вазиятларини яхшироқ ўқишни ва ортиқча фоллардан қочишни талаб қилмоқда . Каннаваронинг фикрича, Ҳусанов баъзан ўз жисмоний кучига ҳаддан ташқари ишониб юборади, бу эса кераксиз сариқ ва қизил карточкаларга сабаб бўлади. Мураббий ёш ҳимоячига рақибнинг жойлашувини ҳисобга олишни ва айниқса ён чизиқ яқинида дарҳол фол ишлатмасдан, тўпни олиб қўйиш учун мос фурсатни кутишни тавсия қилди. Шу билан бирга, жарима майдони ичида марказий ҳимоячи максимал даражада фаол бўлиши шартлиги айтилди.
Шунингдек, мураббий президент билан бўлган суҳбати ҳақида ҳам гапириб берди.
“Суҳбатимиз ажойиб ўтди. Сабаби президент футболни жуда яхши билади. Президент футболни ривожлантириш бўйича ажойиб тушунчага эга. Президентга неаполлик эканлигимни ва шу орқали Италияда футбол маданияти қандай эканлигини, кўчаларда, қишлоқлардаги майдонларда ва ҳаттоки черковларда ҳам футбол ўйналганини, бу нормал ҳолат бўлганини айтдим. Президент футболни ривожлантириш бўйича яхши тушунчага эга эканлиги учун ҳам Ўзбекистонда футбол тез ўсишга эришмоқда.
Президент ажойиб фикр билдириб ўтди. Яъни, футболчиларимиз жаҳон чемпионатига боришганда ҳеч қандай босимни ҳис қилмай, қўрқувсиз ўйнашлари кераклигини айтди. Ростдан ҳам футболчи қўрқувсиз ўйнайдиган бўлсагина, энг яхши ўйинини кўрсата олиши мумкин. Ўзим ҳам уларга ЖЧ-2026дан баҳра олишимиз муҳимлигини айтдим. Жаҳон чемпионати – биз учун катта футбол байрами. Бутун дунёга нимага қодирлигимизни кўрсата олсак, мундиалдан баҳра олишимизни айтдим”, – деди у.
Ўз ўрнида Ҳусниддин Алқиулов масаласига ҳам тўхталиб ўтди.
“Биз жуда яхши ҳимоячини йўқотдик. Мен эндигина келганимда у мени ҳайрон қолдирганди ва жуда яхши таассурот уйғотганди. Ўша пайтда ҳамма Ҳусанов ҳақида гапираётганди, лекин менинг эътиборимни айнан Ҳусниддин Алиқулов тортганди. Биз жуда муҳим футболчини йўқотдик.
Билишимча, у Осиё Кубогида ҳам шундай жароҳат олган экан. Бу афсусланарли ҳолат. Ҳозир физиотерапевт ва докторларимиз билан унинг соғлиғини тиклашга ҳаракат қиляпмиз. Уни Америкага олиб кетишга ҳам уриндик. У менинг мураббийлар штабим билан ишлашда давом этиши керак. Уни Осиё Кубогигача тайёрлаб, турнирга биргаликда йўл олишга ҳаракат қиламиз”, – деди Фабио Каннаваро.
Жамоа етакчиларидан бири Жалолиддин Машариповнинг таъкидлашича, АҚШдаги адаптация жараёни муваффақиятли бошланган.
“Биз жуда яхши етиб келдик, адаптация жараёни ҳам бошланди.Бизни Ню-Ёркда кутиб олган ўзбекистонлик мухлисларимизга ҳам каттакон раҳмат. Насиб қилса, қўлдан келганча терма жамоага мундиалда ёрдам беришга ҳаракат қиламиз. Менимча, ўртоқлик учрашувларида яхши ўйинлар бўлади. Биз ҳам ўзимизни Жаҳон чемпионатидан олдин текшириб оламиз, жуда ҳам яхши ўйлашган. Худо хоҳласа, ҳаммаси ажойиб бўлади”, – деди у.
Терма жамоа сардори Элдор Шомуродов эса баёнотларида Жаҳон чемпионати олдидан мухлисларга ваъда беришда эҳтиёткорлик ва реализм билан ёндашмоқда.
“Йиғинга қўшилишим биланоқ тадбир бўлди. Маросим ҳам ажойиб ўтди, мен ҳам яхши киришиб кетдим, шунингдек, барча футболчилар қўшимча мотивация олди. Мухлисларимизни алоҳида эътироф этишимиз зарур, улар ҳам ажойиб тарзда кузатиб қўйишди. Албатта, ниятимиз бориб, яхши қатнашишдир.
Ҳар бир инсон реалист бўлиши керак. Жаҳон кубогини юртимизга олиб келамиз, деб ваъда бера олмаслигимиз мумкин, лекин аниқ айта оламан — барчамиз яхши ўйин кўрсатиб, қўлдан келганча яхши натижалар билан ортга қайтиш мақсадимиз. Қандай натижа бўлишидан қатъий назар, мухлисларимиз хурсанд бўладиган ўйин кўрсатишга ҳаракат қиламиз”, – деди жамоа сардори.
Маълумот учун, айни дамда терма жамоа Ню-Ёрк шаҳрида ўқув-машғулот йиғинларини ўтказмоқда.
