Музқаймоқ ялашга ҳам ярамайди!..
Ростини айтганда, энг юмшоқ гап шу… Ўзбекистон терма жамоасида иш бўлмабди. Рости худди шундай. Бундай олиб қарасангиз, Канада термасининг даражаси бизники билан тенг ёки бироз пастроқ, гарчи унда «Вильярреал», «Ювентус» ўйинчилари тўп суришса-да… Аммо улар анчагина «тил топишиб» олишибди. Ҳолбуки, уларда ҳам хатолар тиқилиб ётган бўлса-да…
Бизда… Бизда боғламлар умуман йўқ. Бир-бирини тушуниш йўқ. Аниқ ва тезкор «пас»лар йўқ. Ундан кейин Элдор ҳансираб қолди. Бундан келиб чиқадики, бошқа футболчиларимизнинг ҳам тинкалари қуриган. Ундан кейин яна битта расво нарса: бизникилар биринчи таймнинг бошиданоқ ҳакам билан, рақиблар билан тортишиб юришибди. Шу сенга нимага керак? Ҳозир сен майдонга малака ошириш учун тушгансан. Малакангни оширмайсанми? Бўлар-бўлмасга қўполлик қилишга, тортишишга бало борми?!
Ундан кейин Каннаваронинг қандайдир ишланмалари умуман кўзга кўринмади. Бошқача айтганда, «деҳқонча» ўйин. Хуллас, кўнгил тўлмади. Балки, ҳақиқий ўйинни бош мураббий яширгандир… Лекин унда аниқ-тиниқ ўйин барибир кўриниб туриши керак эди-ку. Шуям йўқ-да. Катанец даврида ҳимоявий, «ўлик» ўйин олиб борардик. Кападзе ундан қолишмади. Каннаваро ўзгартирибди-ю, лекин бўлмайди…
Балки ўйиндан-ўйинга «очилиб» кетармиз. Балки, Нидерландия билан бошқача ўйнармиз. Агар ўшанда ҳам ҳеч бало кўринмаса, индамай ортга қайтараверишгани маъқул. Келганларидан кейин аламларидан ўзимизнинг музқаймоқни ейишади…
Ҳа, айтганча, биргина Ҳусановда профессионаллик кўриниб турди. У ортиқча ҳаракат қилмади. Қилган ҳаракати эса аниқ!..
