АҚШ Исроилнинг Ғарбий соҳилни аннексия қилишини қўллаб-қувватламаслигини билдирди
Вашингтон Исроил молия вазири Бецалель Смотричнинг 1997 йилдаги Хеврон протоколининг бир қисмини «бекор қилиш» ҳақидаги баёнотига муносабат билдириб, Ғарбий соҳил аннексиясини қўллаб-қувватламаслигини яна бир бор тасдиқлади.
Аввалроқ Смотрич Хеврон шаҳрининг айрим ҳудудларида режалаштириш, зоналаштириш ва қурилиш масалалари бўйича Фаластин муниципал кенгаши ваколатларини бекор қилганини маълум қилган эди.
Кейинроқ Исроил Ташқи ишлар вазирлиги келишув тўлиқ бекор қилинмаганини таъкидлаб, гап фақат айрим ваколатларнинг ноқонуний яҳудий кўчманчилари билан боғлиқ масалалар бўйича қайта тақсимланиши ҳақида кетаётганини билдирди.
Бунга жавобан АҚШ Давлат департаменти Дональд Трамп маъмуриятининг позицияси аниқ эканини ва АҚШ Ғарбий соҳил аннексиясини қўллаб-қувватламаслигини маълум қилди.
Вашингтон, шунингдек, Ғарбий соҳилда барқарорликни сақлаш Исроил хавфсизлигига хизмат қилиши ва минтақада тинчликка эришиш мақсадига мос келишини таъкидлади.
