Мелони ва Трамп ўртасида яна зиддият юзага келди
Италия бош вазири АҚШ президентини ёлғончиликда айблаб, унинг италиялик журналистга берган интервюсида Мелони Трамп билан суратга тушиш учун “ёлворгани” ҳақидаги баёнотини уйдирма деб атади.
Доналд Трамп Италиянинг La7 телеканалига берган қисқа интервюсида G7 саммитида Жоржа Мелони билан суратга тушгани ҳақида гапирган эди.
«Мелони мен билан гаплашганидан хурсанд бўлгандир. Мен у билан гаплашишим шарт эмасди. У мен билан суратга тушишни жудаям хоҳлади ва буни ёлвориб сўради. Аслида суратга тушмасдим, лекин унга раҳмим келди», — деди Оқ уй раҳбари.
АҚШ президентининг бу сўзлари Италия ҳукуматида кескин норозиликка сабаб бўлди. Мелонинг ўзи махсус баёнот билан чиқиб, Трампнинг айтганлари ҳақиқатга тўғри келмаслигини билдирди.
«Доналд Трампнинг баёнотлари бутунлай уйдирма. Ростини айтсам, бундан ҳайратдаман. Нега АҚШ президенти ўз иттифоқчиларига нисбатан бундай муносабатда бўлаётганини тушунмайман. Бу биринчи марта эмас», — деди у.
Шунингдек, Мелони Трампни Ғарбнинг рақибларига нисбатан анча юмшоқ муносабатда бўлаётганини ҳам танқид қилди.
«Афсуски, Трамп Ғарб ва Қўшма Штатларнинг умумий душманларига қарши ҳам худди шундай қатъият кўрсатмаяпти. У бир нарсани эслаб қолиши керак: на мен ва на Италия ҳеч қачон бировга ёлворади», — дея таъкидлади Италия бош вазири.
Мазкур можаро ортидан Италия ташқи ишлар вазири Антонио Таяни келаси ҳафтага режалаштирилган АҚШ сафари бекор қилинганини маълум қилган. Унинг сўзларига кўра, президент Трампнинг бош вазир Жоржа Мелонига нисбатан айтган ҳақоратомуз сўзлари бутун Италия учун ҳақорат ҳисобланади.
Мелони яқин вақтларгача Трампнинг Европадаги энг яқин сиёсий тарафдорларидан бири ҳисобланган. У ҳатто 2025 йилда Трампнинг инаугурация маросимида қатнашган ягона Европа етакчиси бўлганди. Бироқ жорий йилда Эрон билан боғлиқ можаро юзасидан Трамп ва Мелони ўртасида келишмовчиликлар пайдо бўлган ва икки томон муносабатлари совий бошлаган эди.
