Зеленский Лукашенкога ультиматум қўйдими?
Беларусда Украинага зарбаларни мувофиқлаштирувчи ретрансляторлар жойлаштирилган. Агар Лукашенко уларни олиб ташламаса, буни биз қиламиз — Украина президенти.
Зеленский Россия Беларус жанубида, Беларус-Украина чегараси яқинида, Украинага уюштираётган ҳужумларни мувофиқлаштириш учун фойдаланилаётган ускуналар ўрнатилганини маълум қилди. Украина президенти Беларус раҳбарини ушбу қурилмаларни бир ҳафта ичида тўлиқ олиб ташлашга чақирди.
«Беларусдаги кўп қаватли бинолар устида русларнинг ретрансляторлари бор. Унинг ҳудудида, Украина билан чегарадош иккита вилоят бўйлаб Украина аҳолисига қарата ўт очишни мувофиқлаштирувчи техника жойлашган. Лукашенко буни олиб ташлай оладими? Ўйлайманки, буни қилиш учун унга бир ҳафта етарли бўлади. Агар буни Лукашенко қилмаса, биз қиламиз», — дея таъкидлади Зеленский.
Украина етакчиси, шунингдек, Беларусни Россияга нефт маҳсулотлари етказиб берувчи асосий давлатлардан бири деб атади ва Лукашенкони буни тўхтатишга чақирди.
Зеленский Беларуснинг Россия ва Украина ўртасидаги урушга кирмаслик ҳақидаги ваъдасига шу тариқа муносабат билдирди. Лукашенко бу ҳақда Ал Арабия Энглиш телеканалига берган интервюсида айтган эди.
