Куба парламенти 175 банддан иборат тарихий ислоҳотлар пакетини маъқуллади — Reuters
Агентлик манбаларига кўра, Куба Миллий ассамблеяси мамлакат социалистик иқтисодиётининг салмоқли қисмини хусусийлаштиришни назарда тутувчи ислоҳотлар пакетини бир овоздан қабул қилди.
Қайд этилишича, ҳужжатни ҳукмрон Коммунистик партия ва мамлакатнинг собиқ етакчиси Раул Кастро ҳам қўллаб-қувватлаган. Агар ушбу чора-тадбирлар эълон қилинган шаклда амалга оширилса, бу Куба моделининг 1959 йилги инқилобдан кейинги энг йирик ўзгариши ва бозор иқтисодиётига бурилиш бўлади.
«Ислоҳот Кубада хусусий кўчмас мулк қурилишига йўл очади, давлат корхоналарини акция ва улушларга эга бўлган хусусий тижорат компанияларига айлантириш имконини беради, шунингдек, узоқ вақт давомида давлат монополияси бўлиб келган молия секторига хусусий банкларни киритади. Ҳужжат, шунингдек, давлат мулкини Куба ва хорижлик юридик ҳамда жисмоний шахсларга, жумладан, чет элда яшаётган кубаликларга сотишга рухсат беради», дейилади Reuters хабарида.
«Бу ерда дунёнинг энг қудратли давлати томонидан тарихдаги энг узоқ давом этган блокадани бошдан кечирган социалистик қурилиш жараёнини қандай давом эттириш кераклиги ҳақидаги дилемма муҳокама қилинмоқда. Биз сосиализмдан воз кечмаяпмиз», — деган мамлакат президенти Мигел Диас Канел овоз беришдан аввал.
Reuters’нинг қайд этишича, Куба иқтисодиётини либераллаштириш бўйича таклиф этилган ушбу чораларнинг аксарияти мамлакат ичида ва ташқарисида узоқ йиллар давомида муҳокама қилиб келинган, бироқ айнан Вашингтоннинг қаттиқ босими уларни яна биринчи планга олиб чиққан.
