Медведев Украина билан урушда Россия учун ҳеч қандай қоидалар ва чегаралар қолмаганини айтди
Россия собиқ президентининг сўзларига кўра, Украина Қуролли кучларининг Россия шаҳарларига ҳужумлари тез-тез такрорланаётгани сабабли, Москва учун Киевга нисбатан энди ҳеч қандай қоидалар қолмаган ва бўлиши ҳам мумкин эмас.
Ҳозирда Россия Хавфсизлик кенгаши раиси ўринбосари лавозимида ишлаётган Медведевнинг айтишича, Москва учун ягона истисно фуқароларни қасддан, яъни онгли равишда йўқ қилиш бўлиши мумкин.
Шунингдек, Медведев уруш қонунлари ва одатлари тўғрисидаги Гаага конвенцияларига энди эҳтиёж йўқлигини таъкидлади. Ушбу ҳужжатлар ҳарбий ҳаракатлар иштирокчилари ва тинч аҳолини бир-биридан ажратиш, ҳарбий асирларга нисбатан муносабатда бўлиш, уруш пайтида маданий ёдгорликларни ҳимоя қилиш ва бошқаларни ўз ичига олади.
Медведевнинг ушбу баёноти Украина дронларининг Москва ва Москва вилоятига қилган энг йирик ҳужумидан сўнг янгради. Ушбу ҳужум оқибатида, хусусан, пойтахтдаги нефтни қайта ишлаш заводи ҳам зарба остида қолди.
Украина президенти Зеленский ушбу зарбани Россия ҳарбийларининг яқинда Киевга қилган кетма-кет ҳужумларига жавоб деб атади. Россиянинг сўнгги ҳужумларидан бирида кўплаб инфратузилма объектлари, турар-жой бинолари қаторида Киев-Печерск лавраси (ибодатхонаси) ҳам ёниб кетган ва шаҳарда беш киши ҳалок бўлган эди.
