Алексис Мак Аллистер: Лионель Месси каби футболчи бошқа туғилмайди
Аргентина терма жамоаси ва «Ливерпул» ярим ҳимоячиси Алексис Мак Аллистер жамоадоши Лионель Месси ҳақида юқори фикр билдирди. Унинг таъкидлашича, Мессининг майдондаги ҳаракатларини такрорлаш ёки ундан техник жиҳатдан ўрганиш деярли имконсиз, чунки бу ноёб иқтидор ҳисобланади.
Жазоирга қарши учрашувда хет-трик қайд этган Лионель Месси Аргентинанинг 3:0 ҳисобидаги ғалабасида ҳал қилувчи роль ўйнади. Мак Аллистернинг айтишича, у ҳар сафар Мессининг ўйинидан ҳайратланади.
«Лео билан бир жамоада ўйнашдан катта завқ оламан. У каби футболчи бошқа туғилмайди. Унинг майдонда қилаётган ишлари оддий ҳолат эмас. Мен шунчаки уни кузатиб, қойил қоламан», — деди у.
Ярим ҳимоячи Мессидан техник маҳоратини эмас, балки инсоний фазилатларини ўрганиш мумкинлигини таъкидлади. У буюк футболчининг камтарлиги ва соддалигини алоҳида эътироф этди.
Шунингдек, Алексис Мак Аллистер Жазоирга қарши баҳсдаги биринчи гол олдидан тўпни атайлаб Лионель Мессига қолдирганини айтди. У вазиятни тўғри баҳолаб, жамоадошига қулай имконият яратиб берганини қайд этди.
Айни пайтда Лионель Месси Жаҳон чемпионатлари тарихидаги бир қатор рекордларга яқинлашмоқда. Аргентина терма жамоаси эса кетма-кет иккинчи марта жаҳон чемпиони бўлишни мақсад қилган.
