АҚШ Олий суди грин-карта эгаларига нисбатан депортация тартибларини енгиллаштирувчи қарор қабул қилди
АҚШ Олий суди Федерал чегара хизмати ходимларига грин-картага эга шахсларни депортация қилиш имконини берувчи қарор қабул қилди — ABC News.
Суд қарорида белгиланишича, чегара хизмати агентлари агар грин-карта эгаси турли жиноятларда гумонланувчи бўлса, унга мамлакатга киришни рад этишлари мумкин. Шу билан бирга, чегара агентлари жиноят содир этилганига оид далилларни тақдим этишга мажбур эмаслиги, “шунчаки гумон қилиш учун асослар мавжудлигининг ўзи кифоя” эканлиги алоҳида таъкидланган. Ушбу янгилик, шунингдек, Қўшма Штатларга кириш пунктларига етиб борган шахсларни қонуний доимий резидент (LPR) мақомидан маҳрум қилиш тартибини чегара хизматлари учун сезиларли даражада осонлаштиради.
АҚШнинг амалдаги иммиграция қонунчилигига кўра, АҚШ ҳудудини қонуний асосда қисқа муддатга тарк этган грин-карта эгаларининг мамлакатга қайта киришига рухсат берилиши керак. Бундан фақат грин-карта эгаси жиноят содир этганликда айбдор деб топилган ёки айбига ўзи иқрор бўлган ҳолатларгина мустасно эди.
Олий суднинг бир қатор судялари қабул қилинган қарорга қарши чиққан. Уларнинг фикрича, ҳукумат грин-карта эгасини доимий резидентлик мақомидан маҳрум қилишдан олдин, унинг ҳақиқатан ҳам жиноят содир этганини аввал исботлаб бериши шарт.
