АҚШ Ҳиндистоннинг тўрт компаниясига нисбатан Россия билан боғлиқ санкцияларни бекор қилди
АҚШ Молия вазирлиги Россия билан алоқадорликда гумон қилиниб санкциялар рўйхатига киритилган Ҳиндистоннинг тўртта компаниясига нисбатан чекловларни бекор қилди. Бу ҳақда Hindustan Times нашри хабар берди.
Санкциялар рўйхатидан RRG Engineering Technologies Private Limited, Lokesh Machines Limited, Galaxy Bearings Ltd ва Shaurya Aeronautics Private Limited чиқарилди.
Мазкур қарор ушбу компаниялар АҚШ Молия вазирлиги ҳузуридаги Хорижий активларни назорат қилиш бошқармаси (OFAC)нинг санкциялар рўйхатига киритилганидан қарийб икки йил ўтгач қабул қилинди.
2024 йилда OFAC Россия ҳукуматига санкцияларни четлаб ўтишга кўмаклашганликда айблаб, Ҳиндистоннинг 19 та ташкилоти ва икки нафар фуқаросига нисбатан санкциялар жорий этган эди. Шундан сўнг Ҳиндистон ҳукумати ушбу масала юзасидан АҚШ билан музокаралар олиб бораётганини маълум қилган.
Hindustan Times маълумотига кўра, санкциялардан чиқарилган Lokesh Machines Limited компаниясининг мижозлари қаторида АҚШнинг John Deere ва Cummins, Швециянинг Volvo, шунингдек Япониянинг Honda ва Suzuki каби йирик компаниялари бор.
