Хитой россиялик ҳарбийларни яширинча ўқитган
Россия ҳарбий хизматчилари Хитойда оммавий қирғин қуроллари қўлланилган шароитда ҳаракат қилиш бўйича яширинча тайёргарликдан ўтган. Бу ҳақда Европа расмийлари ва Россия Мудофаа вазирлигининг ички ҳужжатларига таяниб, Reuters агентлиги хабар бермоқда. Олинган маълумотларга кўра, ушбу махфий ўқув дастури шахсан вазир Андрей Белоусов томонидан маъқулланган ва у 2025 йилнинг иккинчи ярмида камида тўрт нафар Россия ва Хитой генералларининг бевосита иштирокида бўлиб ўтган.
Курслардан бири уч ҳафта давом этган бўлиб, у ядровий, кимёвий ва биологик хавфлардан ҳимояланишга бағишланган. Хусусан, россиялик ҳарбийларга кимёвий ва радиациявий разведка олиб бориш, шунингдек, вентиляция тизимларини заҳарланишдан ҳимоя қилиш ўргатилган. Машғулотлар ноябрь ойида Пекиндаги армия объектида ўтказилган. Ҳужжатларда хитойлик йўриқчилар (инструкторлар) раҳбарлигида олиб борилган ўқув жараёни акс этган фотосуратлар мавжуд. Улар, жумладан, россиялик ҳарбийларга ядровий реактор моделини ҳам намойиш этишган.
Ҳужжатлардан маълум бўлишича, тайёргарликдан ўтказиш тўғрисидаги шартномани Россия томонидан генерал-майор Рустам Хусаинов ва Хитой Халқ-озодлик армияси томонидан катта полковник Сунь Даюнь имзолаган. Россия Федерацияси делегациясига Қуруқликдаги қўшинлар бош қўмондони ўринбосари, генерал-полковник Рустам Мурадов раҳбарлик қилган.
Европа расмийларининг фикрича, генералларининг иштироки ҳамда дастурга оммавий қирғин қуролларини қўллаш билан боғлиқ мавзуларнинг киритилиши Москва ва Пекин ўртасидаги ҳарбий ҳамкорлик стратегик хусусиятга эга эканлигидан далолат беради.
Хитой Ташқи ишлар вазирлиги агентликка берган шарҳида ушбу маълумотларни «мутлақо асоссиз» деб атади ва мамлакатнинг Украинадаги уруш бўйича позицияси ўзгаришсиз қолаётганини таъкидлади: Хитой нейтралликни сақлаб келмоқда ва можарони тинч йўл билан ҳал этишда воситачи сифатида чиқиш қилмоқда.
