Франция Россия фуқароларига виза беришни қийинлаштирмоқда
Бу мамлакат сўнгги кунларда шундай чораларни кўрган Италия, Испания ва Венгриядан кейин Европа Иттифоқида тўртинчи бўлди.
Россия туроператорлари уюшмаси маълумотларига кўра, 15 июлдан бошлаб Франциянинг Москвадаги виза маркази Шенген визаси учун ҳужжатларни нотариал ишончнома орқали қабул қилишни тўхтатади.
Эндиликда олдиндан навбатга ёзилиш бўйича ҳужжатларни фақат аризачининг ўзи, 18 ёшга тўлмаган болалар номидан ота-оналар ёки васийлар, шунингдек, яқин қариндошлар: эр-хотин, болалар ва ота-оналар топширишлари мумкин.
Охирги ҳолатда қариндошликни тасдиқловчи ҳужжатларнинг аслини тақдим этиш талаб қилинади, аризачи эса виза олиш учун мурожаат қилишдан олдинги 59 ой ичида биометрия процедурасидан ўтган бўлиши керак. Анкетани аризачи шахсан ўзи имзолаши шарт, биометрия эса 12 ёшдан катта бўлган барча аризачилар учун мажбурийдир.
Аввалроқ, Италиянинг Москвадаги виза марказида Шенген визасини бериш муддати 60 кунгача, Испанияникида эса 45 кунгача узайгани хабар қилинган эди. Венгрия эса Самара, Уфа ва Қозонда виза аризаларини қабул қилишни вақтинча тўхтатди.
