Путин Трампни АҚШ Мустақиллигининг 250 йиллиги билан табриклади ва…
Россия президенти Владимир Путин АҚШ президенти Дональд Трампни 4 июль — АҚШ Мустақиллик кунининг 250 йиллиги муносабати билан табриклади. Табрик матни Кремль расмий сайтида эълон қилинди.
“Ҳурматли жаноб президент, азиз Дональд, Сизни Америка Қўшма Штатлари мустақиллигининг 250 йиллиги билан чин дилдан табриклайман”, дейилади Путиннинг табригида.
Шунингдек, Путин АҚШ давлатининг Мустақиллик декларацияси имзоланиши орқали вужудга келишини “жаҳон тарихидаги муҳим воқеа” деб атади.
“Ўша пайтда Россия Шимолий Америкадаги мустамлакачиларни Буюк Британия ҳукмронлигидан озод бўлиш йўлидаги курашида сўзсиз қўллаб-қувватлаган”, деди Россия президенти.
Путиннинг таъкидлашича, икки ярим аср давомида Россия ва АҚШ муносабатларида кўплаб “шонли саҳифалар” бўлган. У икки давлатнинг жаҳон урушларидаги иттифоқчилигини, инсониятни “нацизм даҳшатлари”дан биргаликда халос этганини, шунингдек замонавий халқаро тартибот асосларини шакллантиришдаги ўрнини эслатди.
Россия президенти бугунги кунда Россия ва АҚШ “дунёнинг энг йирик ядровий давлатлари” сифатида глобал хавфсизлик ва барқарорлик учун алоҳида масъулиятга эга эканини таъкидлади.
Шунингдек, у Дональд Трамп ва унинг оила аъзоларига мустаҳкам соғлиқ, фаровонлик ва муваффақиятлар, АҚШ фуқароларига эса бахт ва равнақ тилади.
4 июль АҚШда Мустақиллик куни сифатида нишонланади. Бу мамлакатнинг асосий миллий байрами бўлиб, 1776 йилда Мустақиллик декларацияси қабул қилинган кун шарафига ўтказилади.
Путин ва Трамп ўртасидаги сўнгги телефон суҳбати 2026 йил 14 июнь куни бўлиб ўтганди
