Песков: Трамп Путиннинг позициясини эшитишга тайёр
Россия президенти матбуот котиби Дмитрий Песков АҚШ президенти Дональд Трампнинг Украина масаласидаги позициясини изчил деб баҳолади ва унинг Россия президенти Владимир Путиннинг фикрларини эшитишга тайёрлигини таъкидлади.
Песковнинг айтишича, Путин ва Трамп ўртасида бўлиб ўтган телефон мулоқоти Россиянинг позициясини АҚШ раҳбарига тўғридан-тўғри етказиш учун муҳим имконият бўлган.
«Президент Трампнинг позицияси анча изчил. Унинг раҳбар сифатидаги ёндашуви ўзгаргани ҳақидаги барча тахминлар ҳақиқатга тўғри келмайди. У вазиятни тушунишда изчил ва ишончли», — деди Песков.
Кремль вакили икки давлат раҳбари яқин келажакда ҳам мулоқотни давом эттириш ниятида эканини билдирди.
Унинг сўзларига кўра, асосий жиҳат шундаки, Дональд Трамп Владимир Путин томонидан етказиладиган маълумотларни эшитишга очиқ.
Шу билан бирга, Песков Трампнинг Украина ва Европа билан боғлиқ сиёсий жараёнларга муносабати ҳақидаги саволга жавоб беришдан бош тортиб, бу масала юзасидан изоҳни Оқ уйдан сўраш кераклигини айтди.
