Россиялик депутат Марказий Осиё давлатлари фуқаролари учун виза режимини жорий этишни таклиф қилди

Россия Давлат Думасининг (парламенти) “Справедливая Россия” фракцияси депутати Сергей Миронов Марказий Осиё мамлакатлари билан виза режимини жорий этиш масаласини кўтарди.

«Умуман олганда, биз Марказий Осиё мамлакатлари билан виза режимини жорий қилиш мумкин, деб ҳисоблаймиз. Буни лоақал Беларус принципи бўйича қилайлик. У ерда шундай тартиб ўрнатилган: қайсидир бизнесменга хорижлик ишчи кучи керак бўлса, биринчи навбатда, ушбу ишни беларусликлар қила олмаслигини исботлаши талаб этилади. Исботладими, жуда яхши.

Шундан сўнг эркаклар учиб келишади ва очиқ майдонда вақтинчалик тураржой қурилади. Биздагидек аҳоли яшайдиган пунктларда эмас. Улар муайян ишни бажаришади, пулини олишади ва кетишади. Ҳеч қандай оилаларсиз», — деди у.

Миронов сўзларига кўра, Россияга кириб бораётган мигрантларнинг бор-йўғи 28 фоизи ишлашни режалаштирган, қолганлари эса бошқа мақсадларда борган.

Шунингдек, депутат агар мигрант жиноят содир этса, унинг қариндошларини ҳам ватанига депортация қилишни таклиф этган. Бундан ташқари, у Россияда мигрантларнинг иқтисодиётнинг муайян соҳаларида ишлашини тақиқлаш керак деб ҳисоблайди.

Бундан ташқари, Миронов баъзи аралаш жанг санъати (ММА) клубларида шуғулланувчиларнинг аксариятини мигрантлар ташкил этаётганидан хавотир билдирган.