Кремль ҳарбий ҳолат жорий этишга тайёргарлик кўряптими?
Урушни ўрганиш институти (ISW) Россия ҳукумати янги сафарбарлик (мобилизация) эълон қилиниши ва ҳарбий ҳолат жорий этилиши мумкин бўлган вазият учун ҳуқуқий ҳамда ташкилий асос яратаётганини маълум қилди. Таҳлилчилар бундай хулосага фуқаролик мудофааси соҳасидаги янги қонунчилик ўзгаришлари ва ташаббуслар сабаб бўлганини айтишмоқда.
ISW маълумотларига кўра, Россия Давлат думаси расмий сафарбарлик даврида судланганлиги ҳали бекор қилинмаган фуқароларга, жумладан, гиёҳванд моддалар контрабандаси ва уюшган жиноий гуруҳларда иштирок этганлик учун ҳукм қилинган шахсларга ҳам Мудофаа вазирлиги билан шартнома тузишга рухсат берувчи қонунни қабул қилган. Мудофаа вазири ўринбосари Виктор Горемикиннинг айтишича, бу ўзгаришлар ҳарбий хизматга кириш ҳуқуқига эга бўлган шахслар доирасини кенгайтиради ва Украинадаги жанговар ҳаракатларда иштирок этиш учун аскар ёллашни соддалаштиради.
Бундан ташқари, Росгвардия фуқаролик мудофааси қоидаларига ўзгартиришлар тайёрлаб, уларга сафарбарлик, ҳарбий ҳолат ва уруш даврида юзага келадиган хавф-хатарлардан аҳолини ҳимоя қилиш бўйича чораларни киритишни таклиф қилган. Шунингдек, ҳарбий хизматчиларни эвакуация қилиш бўйича ваколатларни кенгайтириш ҳам режалаштирилмоқда.
ISW фикрича, бу қадамлар Кремлнинг эҳтимолий сафарбарликка тизимли равишда тайёргарлик кўраётганидан далолат беради. Таҳлилчиларнинг қайд этишича, янги сафарбарлик Россия жамиятида ҳануз жуда оммабоп эмас. Шунингдек, улар 2025 йил ноябрь ойида Владимир Путин сафарбарлик эълон қилмасдан туриб ҳам захирадаги ҳарбийларни жанговор ҳудудга юборишга рухсат берувчи қонунни имзолаганини эслатади. Таҳлилчилар фикрича, бу механизм босқичма-босқич қисман чақирувларни амалга ошириш учун қўлланилиши мумкин.
Шу билан бирга, ISW таъкидлашича, эҳтимолий сафарбарликни эълон қилиш ёки қилмаслик бўйича якуний қарор ҳануз Владимир Путиннинг ўзига ва унинг фронтдаги ҳамда мамлакат ичидаги вазиятга берган баҳосига боғлиқ.
Таҳлилчилар ҳозирча бундай қарор яқин вақт ичида қабул қилинадими ёки йўқми, ҳамда у қандай шаклда амалга оширилишини аниқ айтишнинг имкони йўқлигини қайд этишмоқда.
Материалда, шунингдек, Ғарб разведка хизматлари баҳолари ҳам келтирилган. Унга кўра, 2026 йил ўрталарига келиб Россия қўшинларининг умумий йўқотишлари (ҳалок бўлганлар ва яраланганлар) 1,4 миллион кишига етган, шартнома асосида хизматга қабул қилинаётганлар сони эса энди бу йўқотишларни қоплай олмаяпти.
Бундан ташқари, Reuters агентлигининг Кремлга яқин манбаларига таяниб хабар беришича, Владимир Путин Украинага қарши урушни янада кучайтиришга тайёргарлик кўрмоқда.
