Путин биринчи марта Украина томонидан Wildberries омборларига қилинаётган ҳужумлар ҳақида гапирди
Россия президенти Владимир Путин Украина ҳужумлари оқибатида зарар кўрган логистика омборлари сиғимларини тиклаш кераклигини айтди. У бу ҳақда бугун, 19 август куни Стратегик ривожланиш ва миллий лойиҳалар кенгаши йиғилишида сўз очди.
Путиннинг сўзларига кўра, зарар кўрган объектларни тиклашда давлат ҳам иштирок этиши лозим. У, шунингдек, Россия ҳукуматига мамлакатдаги логистика қувватларини тиклаш бўйича дастур қабул қилишни топширди.
Владимир Путин Украинанинг ҳужумлари Россия саноат ва инфратузилма объектларига зарар етказаётгани, бунинг оқибатида мамлакат иқтисодиётига ҳам салбий таъсир кўрсатилаётганини билдирди. Бироқ у бундай ҳужумлар Россия учун жиддий оқибатларга олиб келмаётганини таъкидлади.
Путин нутқида Wildberries компаниясини бевосита тилга олмади. Бироқ унинг баёноти июл ойидан бери Wildberries’нинг логистика марказлари Украина томонидан ҳужумларга учраётгани фонида янгради. Reuters маълумотларига кўра, июл ўрталаридан бери компаниянинг йигирмага яқин омбори ҳужумлардан зарар кўрган.
