Аргентина ва Буюк Британия ўртасида Фолкленд ороллари масаласи бўйича яна сиёсий можаро авж олмоқда
Аргентина Президенти Хавер Милей:
“Дунё ҳамжамиятига аниқ айтмоқчиман ва Аргентинанинг позициясини билдираман. Малвин (Фолькленд) ороллари тарихан ва ҳуқуқан Аргентинаникидир. Бу борада ҳеч қандай баҳс-мунозара бўлиши мумкин эмас.
Ушбу ороллар миллатимиз шакллана бошлаган даврдан буён Аргентина ҳудудининг бир қисми бўлиб келган. 1833-йилда Буюк Британия Малвин (Фолькленд) оролларини эгаллаб олган, Аргентина ҳокимиятини қувиб чиқарган ва бугунги кунгача давом этиб келаётган мустамлака вазиятини ўрнатган.
Бу шуни англатадики, орол аҳолиси босиб олинган ҳудудга кўчириб келтирилган аҳоли бўлгани сабабли ўз тақдирини ўзи белгилаш бўйича қонуний ҳуқуққа эга эмас ҳамда оролларда ўтказилган референдумларга асосланган ҳар қандай важ ҳақиқий ҳисобланмайди”.
Шунингдек, Милей Британия инқирозга юз тутаётганини айтди. “Буюк Британия инқироз йўлидан кетаётгани аниқ кўриниб турибди. Шу билан бирга, Аргентинанинг келажаги гулдураяпти ва у ғалаба қозонади”, деган Аргентина Президенти.
Буюк Британия ташқи ишлар вазири Эд Милибэнд Фолкленд ороллари бўйича Лондоннинг позицияси ўзгармаслигини маълум қилди: «Ороллар Британияники ва шундайлигича қолади. Чунки орол аҳолисининг мутлақ кўпчилиги айнан шу позицияни қўллаб-қувватлайди».
Фолкленд ороллари: Британияникими ёки Аргентиникми?
Фолкленд ороллари Жанубий Атлантикада жойлашган бўлиб, улар устидан Британия ва Аргентина ўртасидаги баҳс 200 йилга яқин вақтдан бери давом этиб келади. 1833 йилдан ороллар Британия назоратида, 1982 йилда эса Аргентина уларни куч билан эгаллаб олди. Бироқ 74 кунлик урушдан сўнг Британия армияси оролларни қайта назоратга олди — жангларда қарийб 1 000 киши ҳалок бўлди.
2013 йилда орол аҳолиси референдум ўтказиб, 99,8% овоз билан Британия ҳудуди бўлиб қолишни танлаган. Бугун Фолкленд ороллари ички ишларида деярли мустақил бошқарилади, аммо ташқи сиёсат ва мудофаа Британия зиммасида.
Қизиғи, баҳс ҳали ҳам тугамаган. Бугун Аргентина президенти Хавьер Милей оролларга бўлган даъвони яна кучайтирмоқда. Айниқса, ҳудуд яқинидаги катта нефть захиралари масалани янада долзарб қилмоқда. Британия эса ороллар аҳолиси ўз келажагини ўзи белгилаш ҳуқуқига эга эканини таъкидламоқда.
