Нетаньяху Абу-Дабига яширинча борди: учрашув ортида нима бор?
Исроил бош вазири Биньямин Нетаньяху 27 сентябрь куни олдиндан эълон қилинмаган ташриф билан Бирлашган Араб Амирликларига борди. У Абу-Дабида БАА президенти Шайх Муҳаммад бин Зоид Ол Наҳаён билан учрашди.
Исроиллик юқори мартабали амалдор Reuters агентлигига ташриф ҳақиқатдан ҳам бўлиб ўтганини тасдиқлаган. Бироқ Нетаньяху идораси ва БАА Ташқи ишлар вазирлиги учрашув бўйича расмий изоҳ бермаган.
Исроилнинг Channel 12 телеканали хабарига кўра, Нетаньяху Абу-Дабига хусусий самолётда келган. У Исроилдан туш пайтида учиб чиқиб, тахминан соат 15:10 да БАА пойтахтига қўнган ва орадан тўрт соатча ўтиб мамлакатни тарк этган.
Учрашувда қандай масалалар муҳокама қилингани ҳозирча очиқланмаган. Ташриф Яқин Шарқдаги давом этаётган инқирозлар ва Исроил ҳамда БАА ўртасидаги алоқалар фонида бўлиб ўтди. Икки давлат 2020 йилда «Иброҳим келишувлари» доирасида дипломатик муносабатлар ўрнатган.
Учрашувга яна бир сабаб билан эътибор кучайди. Сентябрь ойида Haaretz нашри БАА президенти 2023 йил 7 октябрдаги ҲАМАС ҳужумидан тахминан бир ярим ҳафта олдин Нетаньяхуни йирик операция тайёрланаётгани ҳақида огоҳлантиргани ҳақида хабар берган эди.
The New York Times ҳам кейинчалик бу каби огоҳлантириш бўлгани ҳақида икки манбага таяниб хабар тарқатди. Бироқ Муҳаммад бин Зоид бу маълумотни қаердан олгани ва суҳбатнинг тўлиқ мазмуни очиқ тасдиқланган эмас.
Нетаньяху эса Haaretz хабаридаги маълумотларни рад этган ва газета устидан судга мурожаат қилиш ниятини билдирган. БАА расмийлари ҳам бундай суҳбат бўлганини тасдиқламаган.
Абу-Дабидаги сўнгги учрашувнинг асосий мавзулари ҳозирча сир сақланмоқда. Томонлар эса дипломатик муносабатлар ўрнатилганидан кейин ҳам очиқ ва тўғридан-тўғри алоқа каналларини сақлаб келаётганини билдирган.
