Исроил Саудия Арабистонини Эрон билан урушга жалб қилмоқчи
Саудия Арабистони разведка хизматининг собиқ раҳбари, шаҳзода Турки ибн Файсал Германиянинг Der Spiegel журналига берган интервьюсида Исроил ва АҚШ Эронга қарши ҳарбий кескинликни кучайтирганини айтди. Унинг таъкидлашича, бунинг оқибатлари нафақат Саудия Арабистонига, балки бутун минтақага таъсир қилмоқда.
Шаҳзоданинг сўзларига кўра, Исроил «Буюк Исроил»ни барпо этишга интилаётган бўлса, Эрон ҳам минтақада ўз сиёсатини илгари сурмоқда. Унинг фикрича, ҳар икки томоннинг ҳаракатлари Яқин Шарқдаги кескинликни кучайтирмоқда.
Турки ибн Файсалнинг айтишича, Эр-Риёд АҚШни Эрон билан ҳарбий можаро оқибатлари ҳақида огоҳлантирган, аммо бу огоҳлантиришлар инобатга олинмаган.
Шаҳзода, шунингдек, Европа давлатлари, АҚШ ва Хитойни Ҳурмуз ва Боб ал-Мандаб бўғозларида хавфсизликни таъминлашда иштирок этишга чақирди. Унинг таъкидлашича, ушбу бўғозлар Осиё ва Европа ўртасидаги муҳим савдо йўналишлари ҳисобланади.
Саудия Арабистони, Туркия ва Покистон ўртасида тузилган Макка пакти ҳақида гапирар экан, Турки ибн Файсал иттифоқ ҳозирча тўлиқ оператив марказга эга эмаслигини, бироқ Анқара ва Исломобод Эр-Риёдга қурол-яроғ ва разведка маълумотлари билан ёрдам кўрсатаётганини билдирди.
Ғазодаги вазиятга тўхталар экан, Турки ибн Файсал Ғарб давлатларининг Исроилга кўрсатаётган ёрдами ва қурол етказиб беришини танқид қилди. Шунингдек, у Ғазодаги воқеалар бўйича Ғарбнинг позицияси билан Саудия Арабистонида ўлим жазоси қўлланилиши юзасидан билдирилаётган танқидни қиёслади.
Унинг сўзларига кўра, Саудия қонунчилигида, жумладан, гиёҳванд моддалар контрабандаси учун ўлим жазоси назарда тутилган.
