Индонезияда осмон тўқ сариқ тусга кирди
Индонезияда давом этаётган ўрмон ёнғинлари оқибатида айрим ҳудудларни қуюқ тутун қоплаб, осмон тўқ сариқ тусга кирди.
Айниқса, Марказий Калимантан провинциясида вазият оғир. Тутун сабаб кўриш масофаси кескин қисқарган, ҳавонинг ифлосланиш даражаси эса хавфли кўрсаткичларга етган.
Мамлакатда 270 мингдан ортиқ одамда ўткир нафас йўллари инфекцияси қайд этилган.
Энг заиф тоифалар – ҳомиладор аёллар, болалар, кексалар ва сурункали ўпка касалликлари билан оғриган беморлардир. Аҳолига ҳавони филтрлаш учун махсус респираторлар билан кўчага чиқиш тавсия этилди.
Аввалроқ, Индонезиядаги кенг кўламли ўрмон ёнғинлари узоқ давом этган қурғоқчилик ва Эл-Нино ҳодисаси туфайли тўлиқ трансчегаравий инқирозга айлангани хабар берилганди. Суматра ва Калимантан оролларидаги ёнғинлар тутуни Малайзия ва Сингапурга етиб борди.
Сингапурда ҳаво ифлосланиши индекси 216 пунктга етди, Малайзия ҳукумати эса бир нечта штатларда мактабларни ёпди.
