Чехияда ОАВ тўловлари бекор қилинишига қарши норозилик бўлиб ўтди
Прагада юзлаб одамлар Андрей Бабиш ҳукуматининг жамоатчилик телевидениеси ва радиосини молиялаштириш учун мажбурий йиғимларни бекор қилиш режаларига қарши норозилик намойишига чиқди. Ҳукумат фуқароларнинг тўловлари ўрнига кўрсатув ва эшиттиришлар тарқатувчи ташкилотлар фаолияти учун маблағни тўғридан-тўғри давлат бюджетидан ажратмоқчи. Танқидчилар бу ҳолат ОАВга сиёсий таъсирни кучайтиришидан хавотирда.
Реформа қаршиларининг баҳолашича, келаси йилдаёқ жамоатчилик медиасини молиялаштириш тахминан 15 фоизга қисқариши мумкин. Улар давлат ажратмаларига қарамлик таҳририятларни ҳукумат босими қаршисида ожизроқ қилиб қўйишидан огоҳлантирмоқда.
Европа узатишлар иттифоқи (EBU), Европа журналистлар федерацияси ва «Чегара билмас репортёрлар» ташкилоти ҳам ушбу ташаббусга қарши чиқди. Улар Бабиш ҳукумати ОАВ устидан назоратни кучайтиришга интилаётганидан хавотир билдирмоқда. Ҳукумат эса айбловларни рад этиб, ислоҳот таҳририят мустақиллиги ва дастурлар мазмунига таъсир қилмаслигини таъкидламоқда.
Ҳукмрон коалиция ўзгаришлар заруратини жамоатчилик медиаси воқеаларни холис ёритмаётгани ва харажатларни қисқартириши кераклиги билан изоҳламоқда. Бундан ташқари, ҳукумат мажбурий йиғимлардан бюджетдан молиялаштиришга ўтиш умумевропа тенденциясига мос келишини айтмоқда.
