Трамп Конгресс сайловларида мағлубиятга учради: Эронга қарши уруш унинг мавқеига зарба берди
АҚШда ўтказилган Конгресс сайловларида президент Дональд Трамп ва унинг Республикачилар партияси жиддий сиёсий мағлубиятга учрагани айтилмоқда. Эроннинг Tasnim агентлиги бу натижани Вашингтоннинг Эронга қарши урушдаги муваффақиятсизлигининг яна бир белгиси сифатида баҳолади.
Агентлик хабарида келтирилишича, дастлабки натижалар Сенатда ҳам Трамп тарафдорлари учун салбий бўлган. Вакиллар палатаси эса 95 фоиздан ортиқ эҳтимол билан Демократик партия назоратига ўтиши кутилган.
Мақолада таъкидланишича, АҚШда ўтказилган сўровномалар америкаликларнинг катта қисми Эронга қарши уруш оқибатлари мамлакат аҳолисининг оилавий харажатларига таъсир кўрсатишидан хавотирда эканини кўрсатган. Респондентларнинг аксарияти ушбу уруш катта харажатларга арзимаслигини билдирган. Шунингдек, сўров иштирокчиларининг атиги 23 фоизи Трампнинг Эронга қарши ҳарбий ҳаракатлар бўйича аниқ стратегияси борлигига ишонган.
Материалда келтирилган яна бир маълумотга кўра, америкаликларнинг 50 фоиздан ортиғи Конгресс сайловларидаги овозлари амалда Трампга қарши қаратилганини айтган.
Tasnim Трампнинг рейтинги ҳам Эронга қарши урушдан кейин сезиларли даражада пасайганини таъкидлайди. Агентлик муаллифининг фикрича, республикачиларнинг сайловдаги мағлубияти Эроннинг урушдаги устунлигини кўрсатади.
Мақолада шу билан бирга, АҚШдаги ҳар икки йирик партия — республикачилар ва демократлар — Эронга нисбатан бир хилда салбий сиёсат юритиши қайд этилган. Муаллиф Теҳрон ўз сиёсатини Вашингтонда қайси партия ҳокимиятда эканига қараб белгиламаслигини таъкидлаган.
