Туркманистон газини Туркияга етказиб беради
Туркия ва Туркманистон ўртасида табиий газ етказиб бериш бўйича келишув якуний босқичга етди. BOTAŞ ва Türkmengaz компаниялари ўртасида имзоланган битимга кўра, газ етказиб бериш 2025 йил 1 мартдан бошланади.
Бу ҳамкорликнинг асоси 2024 йил март ойида Анталия дипломатик форумида қўйилган эди. Ўшанда Туркия президенти Ражаб Тоййиб Эрдўған ва Туркманистон Халқ Маслаҳатининг раиси Гурбангули Бердимуҳамедов учрашиб, газ соҳасида ҳамкорлик қилиш ва туркман газини Туркия орқали Европага етказиш ниятини билдиришган.
2024 йил июль ойида Туркия энергетика вазири Алпарслан Байрактар Туркманистонга ташриф буюриб, икки давлатнинг газ лойиҳасини ишга тушириш борасида сиёсий иродага эга эканини таъкидлаган. Шундан сўнг келишувнинг техник ва ҳуқуқий асослари ишлаб чиқилди.
BOTAŞ ва Türkmengaz ўртасидаги ушбу шартнома икки давлат ўртасидаги энергетик ҳамкорликда янги даврни бошлаб берди. Алпарслан Байроқлар бу келишувни «тарихий қадам» деб атаб, у Туркия ва минтақанинг энергетик хавфсизлигини мустаҳкамлашини таъкидлади.
«Бу битим устида йиллар давомида иш олиб бордик. Энди у ҳақиқатга айланиб, Туркия ва Туркманистон ўртасидаги стратегик ҳамкорликни янада мустаҳкамлайди», — деди Байрактар .
Туркман газининг Туркия орқали экспорт қилиниши Европа энергетик бозорига янги имкониятлар очади. Бу лойиҳа Туркиянинг глобал газ транзит маркази сифатидаги ролини янада кучайтиради, шунингдек, Анқара ва Ашхобод ўртасидаги алоқаларни мустаҳкамлайди.
