Сунъий интеллект сабаб банк ходимлари бўшатилмоқда
Жануби-Шарқий Осиёнинг энг йирик молия институтларидан бири бўлган ДБС Гроуп Ҳолдингс Лтд. яқин уч йил ичида 4 минг ходимини қисқартириш режасини эълон қилди. Бунга сунъий интеллект технологияларининг ривожланиши ва инсонлар томонидан бажарилаётган вазифаларни самаралироқ уддалай бошлагани сабаб қилиб кўрсатилмоқда.
Ушбу режани банкнинг бош ижрочи директори Пиюш Гупта тасдиқлаган. Унга кўра, қисқартиришлар асосан вақтинчалик ва шартнома асосида ишловчи ходимларга тааллуқли бўлиб, доимий ишчиларга таъсир қилмайди. Айни пайтда ДБС банкининг штати 41 мингдан ортиқ ишчини ташкил этади.
Экспертларнинг фикрича, бу жараён фақат битта банк билан чекланмайди. Таҳлилларга кўра, келгуси 3-5 йил ичида жаҳон банк секторида сунъий интеллектнинг жорий этилиши туфайли 200 мингга яқин иш ўрни қисқариши мумкин.
Бироқ, ЖПМорган Часе банкида сунъий интеллект бўйича масъул Терезе Хайтсенретер АИ технологиялари иш ўринлари камайишига эмас, аксинча, кенгайишига хизмат қилаётганини таъкидлаган.
Шу билан бирга, дунё бўйлаб сунъий интеллект мутахассисларини тайёрлашга эътибор кучаймоқда. Жанубий Корея сунъий интеллект соҳасида мутахассислар етиштиришга қаратилган янги ўқув марказлари ва дастурларни ишга туширган.
Бундан ташқари, Халқаро Валюта Жамғармаси томонидан Давос Жаҳон иқтисодий форуми олдидан эълон қилинган тадқиқотда илғор мамлакатлардаги иш ўринларининг 60 фоизи сунъий интеллект таъсирига тушиши мумкинлиги қайд этилган. Бу эса, молия секторида катта ўзгаришлар кутилаётганидан далолат беради.
